झापा : झापाको भद्रपुरस्थित मेची पुल हुँदै भन्सार छली गरिएको ठूलो परिमाणको चिनी बिर्तामोडमा नियन्त्रणमा लिइएपछि सीमावर्ती क्षेत्रमा तस्करी गतिविधि मौलाएको संकेत मिलेको छ।
बिहीबार दिउँसो बिर्तामोड नगरपालिका–५ सुब्बा चौकमा इलाका प्रहरी कार्यालय बिर्तामोडबाट खटिएको टोलीले विशेष सूचनाका आधारमा पिकअप गाडी रोकेर चेकजाँच गर्दा तस्करी गरिएको सामान फेला परेको हो।
मे १ च ६२८४ नम्बरको पिकअप गाडी भद्रपुरबाट बिर्तामोडतर्फ आइरहेको अवस्थामा जाँच गर्दा ५० केजीको दरले २५ बोरा भारतीय चिनी लुकाइराखिएको अवस्थामा बरामद गरिएको प्रहरी स्रोतले जनाएको छ।
दैनिक उपभोग्य वस्तु बिक्री गर्ने पसलहरूमा वितरण गर्ने नाटकसहित चिनीलाई भुजा, चिप्स बल, अण्डा आदिको छाप लगाएर गाडीमा राखिएको थियो।
चालक कन्काई नगरपालिका–८ का ३२ वर्षीय नारायण सिटौलालाई प्रहरीले नियन्त्रणमा लिएको छ। बरामद गरिएको चिनीको अनुमानित मूल्य १ लाख २५ हजार रुपैयाँ र पिकअप गाडीको मूल्य १२ लाख रुपैयाँ तोकिएको छ।
पक्राउ परेका चालक र बरामद सामग्रीलाई आवश्यक कारबाहीका लागि मेची भन्सार कार्यालय काँकडभिट्टा पठाइएको जिल्ला प्रहरी कार्यालय झापाका डीएसपी खगेन्द्र खड्काले जानकारी दिए।
यता, स्थानीय व्यापारीहरूका अनुसार मेची पुल हुँदै भन्सार गेट अगाडि नै सशस्त्र प्रहरी र नेपाल प्रहरीको उपस्थिति हुँदाहुँदै पनि दैनिक सयौं बोरा चिनी, खैनी, बिडी, रजनीगन्धा तथा अन्य खाद्य सामग्रीहरू भित्रिने क्रम बढ्दो छ।
उनीहरूको भनाइअनुसार केही व्यापारीहरूले थोरै परिमाणको सामान भन्सार तिरेर धेरै परिमाणमा अवैध रूपमा लैजाने गरेका छन्।
एक व्यापारीका अनुसार प्रहरीकै मिलोमतोमा मौका छोपेर लत्ताकपडा, इलेक्ट्रोनिक्स, जुत्ता–चप्पल, बिउबिजन, मेसिनरी औजारहरू पनि भन्सार नतिरी सीमाबाट सोझै भित्र्याउने गरिएको छ। यसरी बढ्दो तस्करीले राज्यको राजस्व गुमाउने मात्र होइन, स्थानीय बजारमा अस्वस्थ प्रतिस्पर्धा र सुरक्षाको चुनौतीसमेत थपिएको छ।
Discussion about this post