भोजपुर : भोजपुरको रामप्रसादराई गाउँपालिका–२ धोद्लेखानीमा गएति एकै परिवारका चार जनाको सामूहिक हत्या प्रकरणमा मृतक सबैजनाको शव भोजपुर सदरमुकाम ल्याइएको छ।
प्रहरीले घटनास्थलको मुचुल्का तयार गरी मृतकहरूको शव परीक्षण गर्न सदरमुकाम ल्याइएको हो।
भोजपुर नगरपालिका–२ हेलौँछा घर भएका ३० वर्षीय राजेन्द्र राईले १५ वर्षीया मनिषा गिरी, ६८ वर्षीय बेलबहादुर गिरी, ४५ वर्षीया मञ्जु गिरी र ९ वर्षीय सपन गिरीको शनिबार राति हत्या गरेका हुन्।
जिल्ला प्रहरी कार्यालय भोजपुरका प्रहरी निरीक्षक दीपक श्रेष्ठका अनुसार हत्या गरिसकेपछि राजेन्द्रले नै प्रहरीलाई खबर गरेका थिए। ‘मैलै मान्छे मारेको छु, समाउन आउनू’ भनेर राजेन्द्रले प्रहरीलाई फोन गरेको श्रेष्ठले जानकारी दिए।
घटनाको जानकारी प्राप्त हुनासाथ नजिकमा रहेको अस्थायी प्रहरी चौकी ओख्रेबाट खटिएको प्रहरी टोलीले घटनामा संलग्न राईलाई रामप्रसादराई गाउँपालिका १ हर्वु भञ्ज्याङस्थितबाट पक्राउ गरेको हो ।
उनको पेटमा धारिलो हतियारको गहिरो चोट देखिएपछि थप उपचारका लागि धरानस्थित बीपी कोइराला स्वास्थ्य विज्ञान प्रतिष्ठान पठाइएको छ।
राजेन्द्र र मनिषाबीच करिब सात महिनाअघि प्रेम विवाह भएको थियो।
तर, पछिल्लो समय उनीहरूबीच सम्बन्ध बिग्रिएपछि मनिषा माइतीघरमै बस्दै आएकी थिइन्। पछिल्लोपटक राजेन्द्र श्रीमतीलाई लिन ससुराली गएको तर परिवारले असन्तुष्ट जनाएपछि परिवारका सबै जनालाई पालैपालो हत्या गरेका थिए।
घटनास्थलको कानूनी प्रक्रिया पूरा गरी चार वटै शवलाई पोस्टमार्टमको लागि जिल्ला अस्पताल भोजपुर पठाएर घटना सम्बन्धमा जिल्ला प्रहरी कार्यालय भोजपुरबाट थप अनुसन्धान भइरहेको प्रहरीले जनाएको छ।
Discussion about this post