इटहरी : भोजपुरको रामप्रसादराई गाउँपालिका–२ धोद्लेखानीमा शनिबार राति सामूहिक हत्याकाण्डमा मारिएका चार जनाको सोमबार साँझ इटहरीस्थित बूढीगंगा जमुना मुक्तिघाटमा अन्त्येष्टि गरिएको छ।
हत्या गरिएकामध्ये १५ वर्षीया मनिषा गिरी, उनका बुवा ६८ वर्षीय बेलबहादुर गिरी, आमा ४५ वर्षीया मञ्जु गिरी र भाइ ९ वर्षीय सपन गिरीको सामूहिक दाहसंस्कार गरिएको हो।
घटनापछि शवलाई आइतबार जिल्ला अस्पताल भोजपुर लगिए पनि पोस्टमार्टम उपकरण अभावमा धरानस्थित बीपी कोइराला स्वास्थ्य विज्ञान प्रतिष्ठानमा ल्याइएको थियो। पोस्टमार्टमपछि शवहरू इटहरी ल्याएर अन्त्येष्टि गरिएको हो।
जसमध्ये बेलबहादुर र मञ्जुको एकै चितामा अन्त्येष्टि गरियो भने सपन र मनिषाको छुट्टाछुट्टै चितामा अन्त्येष्टि गरियो ।
हत्या प्रकरणका अभियुक्त ३० वर्षीय राजेन्द्र राई आफैँ पनि घाइते अवस्थामा भेटिएका थिए। हाल उनी धरानको बीपी प्रतिष्ठानमा उपचाररत छन्।
भोजपुर नगरपालिका–२ हेलौँछा घर भएका राईले प्रेम विवाह गरेकी श्रीमती मनिषा गिरी र उनका परिवारको हत्या गरेका थिए।
घटनाको पृष्ठभूमि
रामप्रसादराई गाउँपालिका २ का वडाध्यक्ष राजकुमार तामाङ (समीर)का अनुसार मृतक बेलबहादुरका जेठा छोराले चारैजनालाई दागबत्ती दिएका हुन्।
उनले टाकुरा न्यूजसँग भने, ‘भोजपुर अस्पतालमा पोस्टमार्टमको सुविधा नभएपछि शवहरू धरान ल्याइएका थिए । पोस्टमार्टमपछि इटहरीमा अन्त्येष्टि गरिएको हो।’
करिब सात महिनाअघि राजेन्द्र र मनिषाबीच प्रेम विवाह भएको थियो। तर पछिल्लो समय सम्बन्धमा दरार आएपछि मनिषा माइतमा बस्दै आएकी थिइन्।
केही दिनअघि मात्रै ससुराली आएका राजेन्द्रले पत्नीलाई आफूसँग नपठाएको निहुँमा आक्रोशित हुँदै सामूहिक हत्या गरेका थिए। हत्या गरेपछि उनले आफैँ प्रहरीलाई खबर गरेका थिए।
हाल घटनाको विषयमा प्रहरीद्वारा सूक्ष्म अनुसन्धान जारी रहेको प्रहरीले जनाएको छ।
यो पनि – भोजपुर हत्या घटना : शवलाई ‘फरेन्सिक’ परीक्षण गर्न धरान ल्याइयो
यो पनि – भोजपुरमा एकै परिवारका चार जनाको हत्या प्रकरण : मृतक सबैको शव सदरमुकाम ल्याइयो
भिडिओ
Discussion about this post