इटहरी : कोशी प्रदेश प्रहरीले आर्थिक वर्ष २०८१।०८२ मा लागूऔषध गाँजाको कारोबार, ओसारपसार र खेती नियन्त्रण गर्न आक्रमक अभियान सञ्चालन गर्दै २६ हजार ७०५ किलोभन्दा बढी गाँजा बरामद गरेको छ ।
यसैगरी १७ लाख ७२ हजारभन्दा बढी गाँजाका बोट तथा बेर्ना नष्ट गरेको छ।
विशेष सूचना र अनुसन्धानका आधारमा प्रदेशका विभिन्न जिल्लामा सञ्चालन गरिएका कारबाहीहरूबाट उल्लेखनीय परिणामहरू हासिल भएका छन्।
जिल्लागत रूपमा हेर्दा सबैभन्दा धेरै सुनसरीबाट गाँजा बरामद गरिएको छ । सुनसरीबाट १२,३७५ किलो, मोरङबाट ६,६५० किलो, धनकुटाबाट ४,१९४ किलो, उदयपुरबाट १,८१० किलो, र झापाबाट १,६५१ किलो गरी प्रदेशभरबाट जम्मा २६,७०५ किलो ५३८ ग्राम गाँजा बरामद गरिएको हो।
गाँजाको ओसारपसारमा संलग्न रहेको अभियोगमा एक सय ६५ जना पुरुष र २४ जना महिलालाई पक्राउ गरिएको छ।
साथै, ३१ वटा चारपाङ्ग्रे र ७५ वटा दुईपाङ्ग्रे सवारीसाधन नियन्त्रणमा लिइएको प्रहरीको भनाइ छ। लागूऔषध लुकाउन एम्बुलेन्स, तरकारी गाडी, सरकारी नम्बर प्लेट, मोटरसाइकल, नदीमार्ग र जमिनमुनीको समेत प्रयोग भएको प्रहरीले जनाएको छ।
त्यस्तै, गाँजाको खेतीसमेत नियन्त्रणमा लिन प्रहरीले आक्रमक कदम चालेको उदृत गरेको छ।
गाँजाको बोट तथा बेर्नाहरू नष्ट गर्ने क्रममा जिल्ला प्रहरी कार्यालय धनकुटाले १२ लाख ५९ हजार बोट तथा बेर्ना, भोजपुरले २८ लाख ४६ हजार बोट तथा बेर्ना, उदयपुरले १६ लाख ८ हजार ५ सय बोट तथा बेर्ना, सोलुले २९ हजार ७ सय बोट तथा बेर्ना, खोटाङले २६ हजार २ सय बोट तथा बेर्नासहित बिभिन्न प्रहरी कार्यालयबाट परिचालित प्रहरी टोलीले जम्मा २ हजार ४ सय ६४ रोपनी क्षेत्रफलमा लगाएको १७ लाख ७२ हजार भन्दा बढी गाँजाको बोट तथा बेर्नाहरू नष्ट गरेको प्रहरीले जनाएको छ।
प्रहरीका अनुसार जम्मा दुई हजार ४६४ रोपनी क्षेत्रफलमा फैलिएको गाँजाको खेती नष्ट गरिएको हो।
प्रहरीले नागरिकलाई लागूऔषध नियन्त्रणमा सहयोग गर्न अनुरोध गर्दै यस्ता गतिविधि देखेमा प्रहरीलाई जानकारी गराउन आग्रहसमेत गरेको छ।
Discussion about this post