इटहरी : चाडपर्वलाई लक्षित गरी कोशी प्रदेशभरका विभिन्न स्थानहरूमा सुरक्षालाई प्रभावकारी बनाउन प्रहरीले गस्ती तथा निगरानीलाई तीव्र पारेको छ।
चाडपर्वको समयमा नागरिकले निश्चिन्त वातावरणमा उत्सव मनाउन सकून् भन्ने उद्देश्यका साथ जिल्ला प्रहरी कार्यालयहरू तथा सम्बन्धित इकाइका प्रहरी टोलीहरू निरन्तर सक्रिय रहिरहेका छन्।
कोशी प्रदेश प्रहरी कार्यालय विराटनगरकाअनुसार भीडभाड हुने बजार, बसपार्क, यात्रा मार्ग, धार्मिक स्थल र मेलापात हुने स्थानहरूमा विशेष ध्यान दिइएको छ।
दुर्घटना, चोरी, ठगी तथा अन्य आपराधिक गतिविधि रोकथामका लागि प्रहरी गस्ती मात्र नभई सादा पोशाकमासमेत प्रहरी परिचालन गरिएको छ।
यसै क्रममा प्रहरीले ‘सभ्य बनौँ, सुरक्षित रहौँ, हर्षोल्लासका साथ चाडपर्व मनाऔँ, आपत–विपत्मा सदैव प्रहरीलाई सम्झौँ’ भन्ने सन्देशसहित आम नागरिकलाई सचेत रहन र सुरक्षामा सहयोग गर्न आग्रह गरेको छ।
प्रहरीले यात्रु तथा सवारी चालकलाई ट्राफिक नियम पालना गर्न, मादक पदार्थ सेवन गरी सवारी नचलाउन, चोरी–डकैती वा झगडाजस्ता गतिविधि देखेमा तत्काल नजिकैको प्रहरी निकायलाई जानकारी दिन अनुरोध गरेको छ।
प्रहरी प्रशासनले स्थानीय तह, समुदाय र नागरिकको सहकार्यमार्फत मात्र सुरक्षित र व्यवस्थित चाडपर्व सम्भव हुने जनाएको छ।
Discussion about this post