इटहरी : भदौ २४ गतेको जेनजी आन्दोलनले यातायात व्यवस्था कार्यालय कोशीको कार्यालय जलाइएको छ।
कार्यालय जलेर प्रयोगविहीन भएपछि आन्तरिक मामिला तथा कानून मन्त्रालय, कोशीले मातहतका सबै कार्यालयलाई “सेवा स्थगित” गर्ने परिपत्र जारी गर्यो। सेवाग्राहीलाई स्पष्ट सूचना दिइयो, नयाँ सवारी दर्ता हुन सक्दैन।
तर, वास्तविकता अर्कै देखिएको छ। मन्त्रालयकै आदेशलाई नजरअन्दाज गर्दै यातायात व्यवस्था कार्यालय इटहरी (सवारी दर्ता)का कार्यालय प्रमुख बाबुराम लुइँटेलले घरबाट असोज ५ र ७ गते नयाँ सवारी दर्ता गरेको खुलेको छ।
सेटिङको आरोप
दशैंमा नयाँ गाडी खरिद बढ्ने अवसरलाई निजी गाडी कम्पनीसँगको “सेटिङ”मार्फत उपयोग गरिएको आरोप छ।
कम्पनीहरूले राजस्व तिरेका आधारमा दर्ता गर्नु सामान्य प्रक्रिया हो भन्ने लुइँटेलको जिकिर भए पनि सेवा नै स्थगित भएको अवस्थामा कसरी दर्ता सम्भव भयो ? भन्ने प्रश्न खडा भएको छ ।
नयाँ सवारी दर्ताका लागि प्रयोग हुने रिम्स र भीआरएस सफ्टवेयरमा को, कहाँबाट, कुन युजर आईडी प्रयोग गरेर प्रवेश गर्यो भन्ने यकिन हुनुपर्ने हो।
तर, मन्त्रालयले नै दर्ता भएको तथ्य सार्वजनिक गर्नु प्रशासनिक निगरानी प्रणालीमै गम्भीर प्रश्न उठ्छ।
आन्तरिक मामिला तथा योजना मन्त्री रेवतीरमण भण्डारीले घटना पुष्टि गर्दै लुइँटेलसँग स्पष्टीकरण मागिएको बताए।
मन्त्रालयले सबै यातायात कार्यालयलाई कुन युजर आईडी प्रयोग भयो, कहाँबाट सेवा दिइयो भन्ने विवरण पेस गर्न निर्देशन दिएको उनको भनाइ छ।
यता, यातायात कार्यालयले भने जरिवाना पर्ने डरले व्यावसायीहरूले दर्ता गर्न माग गरेपछि रसिद मात्रै काटेको जनाएको छ।
Discussion about this post