इटहरी : इटहरी उपमहानगरपालिकाका मेयर हेमकर्ण पौडेलका प्रेस संयोजक धनबहादुर पुरीले राजीनामा दिएका छन् ।
जेनजी आन्दोलनका कारण नगरले क्षति व्यहोरेको र आर्थिक भार परेको भन्दै पुरीले आइतवार पदबाट राजीनामा दिएका हुन् ।
‘जेनजी आन्दोलनका कारण इटहरी उपमहानगरपालिकाले अकल्पनीय क्षति व्यहोर्नुपरेको छ । उपमहानगरको कार्यालय भवन नै जलेर खरानी भएको छ, सम्पूर्ण अभिलेखहरू नष्ट भएका छन्, सेवाका लागि प्रयोग गरिएका सवारी साधनहरूसमेत जलेर प्रयोगविहीन बनेका छन्। करोडौँको क्षति भएको यस अवस्थाले हाम्रो नगरको विकास र सेवा प्रवाहमा ठूलो चुनौती थपिएको छ । यस्तो कठिन घडिमा नगरपालिका माथि थप आर्थिक भार नपरोस भन्ने नपरोस भन्ने आत्मभावनाले प्रेरित भई म आफ्नो पद प्रेस संयोजकबाट राजिनामा दिने निर्णयमा पुगेको छु,’ उनले बुझाएको राजीनामा पत्रमा भनिएको छ ।
आगामी दिनमा नगर र जनताप्रतिको प्रतिबद्धता यथावत रहने उनले जिकिर गरेका छन् । इटहरीलाई पुनः उभ्याउन, ध्वस्त संरचना र प्रणालीलाई पुनर्जिवित गर्न, सहयोग गर्नेसमेत उनले उल्लेख गरेका छन् ।
वि.सं. २०७९ असोज ३१ गते मेयर पौडेलले पुरीलाई प्रेस संयोजकमा नियुक्त गरेका थिए ।
यो पनि – इटहरीका नगर प्रमुख हेमकर्ण पौडेलको प्रेस संयोजकमा तरहराका धनबहादुर पुरी नियुक्त
Discussion about this post