इटहरी : मोरङको विराटचोकमा रहेको साहित्यिक संस्था नझरेका फूलहरूले आफ्नो ५५औँ शृङ्खलामा कविता कन्सर्ट कार्यक्रमको आयोजना गरिएको छ ।
इटहरीस्थित सङ्गीत साधना प्रतिष्ठान नेपालको सभाहलमा संस्थाले कवि डा. अस्मिता विष्टको कविता कन्सर्ट आयोजना गरेको हो । अघिल्लो महिना डा. विष्टले ‘ब्ल्याकहोलमा गीतहरू’ कवितासङ्ग्रह प्रकाशनमा ल्याएकी थिइन् ।
विष्टको सङ्ग्रहभित्रबाट भरत बर्बरिक, सविता फागो, पुरन याक्खा, करुणा राई, विवेक विवश रेग्मी, किरण टी लिम्बु, पुष्पा बोगटी, नवीन थापा क्षेत्री, लीला अनमोल, हेमन यात्री र देवान किरातीले कविता वाचन गरे ।
धरानस्थित महेन्द्र क्याम्पसकी उपप्राध्यापकसमेत रहेकी विष्टलाई सम्मानसमेत प्रदान गरियो। कार्यक्रमका प्रमुख अतिथि प्रसिद्ध कवि मनु मञ्जिलले उनलाई सम्मान गरे ।
कार्यक्रममा बोल्दै कवि मञ्जिलले विष्टका कवितामा समसामयिक जीवनका विविध पाटाहरू र नारी मनका कोमल संवेदनाहरूका गहिरा अनुभूति अभिव्यक्त रहेको बताए ।
साथै, कार्यक्रममा दुर्गा पराजुली र कृष्ण राजा श्रेष्ठले गीत प्रस्तुत गरे ।
नझरेका फूलहरूका अध्यक्ष केपी घिमिरेका अनुसार संस्थाले निरन्तर पूर्व क्षेत्रमा साहित्यिक एवम् सांगीतिक कार्यक्रमको आयोजना गर्दै आएको छ ।
कार्यक्रममा साहित्यप्रेमी, कवि तथा साहित्यकारहरूको उत्साहपूर्ण उपस्थिति रहेको थियोे ।
Discussion about this post