मोरङ : मोरङ जिल्ला प्रहरी कार्यालयले करिब ५ हजार ५ सय २७ किलो गाँजा नष्ट गरेको छ।
विभिन्न मितिमा बरामद गरिएको उक्त गाँजा शुक्रबार प्रहरी कार्यालयको परिसरभित्र खाल्डो खनेर गाड्ने विधिबाट नष्ट गरिएको हो।
प्रहरी प्रमुख एसपी कवित कटवालका अनुसार ठूलो मात्रामा गाँजा खाल्डोमा गाडेर नष्ट गरिएको हो ।
वातावरणीय प्रभावबाट जोगिन तथा स्थानीयवासीलाई धुँवाको समस्या नहोस् भन्ने उद्देश्यले खाल्डो खनेर नष्ट गरिएको हो ।
विगतमा बाहिर जलाएर नष्ट गर्दा धुँवाका कारण गुनासा आएको र खाल्डोमा पुरिएका सामग्री बाहिरबाट कोही खनेर लैजाने घटनासमेत पाइएकाले यसपटक कार्यालयभित्रै नष्ट गरिएको एसपी कटवालले बताए।
कोशी प्रदेशका पहाडी जिल्लाहरू धनकुटा र भोजपुरमा व्यवसायिक रूपमा गाँजा खेती हुने गरिएको छ।
जसलाई तस्करीमार्फत मोरङ, सुनसरी र झापा हुँदै भारत पठाइने गरेको प्रहरीले जनाएको छ।
Discussion about this post