मोरङ : मोरङको लेटाङ नगरपालिका–२ की १३ वर्षीया अंशु गौतमको हत्या प्रकरणमा पक्राउ परेका पदम बहादुर अधिकारीलाई मोरङ जिल्ला अदालतले पुर्पक्षका लागि जिल्ला कारागार चलान गर्ने आदेश दिएको छ।
अदालतले बिहीवार (पुस १७ गते) थुनछेक आदेश जारी गर्दै प्रतिवादी अधिकारीलाई कारागार पठाउने निर्णय गरेको जिल्ला अदालत मोरङका सूचना अधिकारी हेमबहादुर बुढाथोकीले जानकारी दिए।
गौतम असोज ७ गते घरबाट निस्किएपछि बेपत्ता भएकी थिइन्। परिवार र स्थानीयवासीको खोजीपछि पनि फेला नपरेपछि प्रहरी प्रशासनमार्फत खोजतलास तीव्र बनाइएको थियो।
१८ दिनपछि असोज २४ गते बेलबारी–चिसाङ साझेदारी वन क्षेत्रमा उनको शव फेला परेको थियो।
घटनापछि प्रहरीले प्राविधिक विश्लेषण, प्रमाण सङ्कलन तथा सम्बन्धित व्यक्तिहरूको बयानका आधारमा अनुसन्धान अघि बढाएको थियो।
अनुसन्धानका क्रममा सोही क्षेत्रमा बसोबास गर्दै आएका पदम बहादुर अधिकारीमाथि शङ्का गहिरिएपछि उनलाई नियन्त्रणमा लिइएको थियो। उनी घटनापछि भारततर्फ गएको खुलेपछि प्रहरीको समन्वयमा फर्किएलगत्तै पक्राउ परेका थिए।
पीडित परिवारका तर्फबाट अंशुका बुबा नवीन गौतमले किटानी जाहेरी दिएका थिए। प्रहरीले अनुसन्धानका क्रममा सङ्कलित प्रमाण अदालतमा पेस गरेपछि पर्याप्त आधार देखिएको ठहर गर्दै अदालतले प्रतिवादीलाई पुर्पक्षका लागि कारागार चलान गर्ने आदेश दिएको हो।
Discussion about this post