इटहरी : सुनसरीको दुहबी नगरपालिका-८ स्थित जुटमिल अगाडि कोशी राजमार्गमा दुई मोटरसाइकल एकआपसमा ठोक्किँदा एक जनाको मृत्यु भएको छ ।
दुर्घटनामा पछाडि सवार सप्तरी फुलहारा-३ घर भई हाल सुनसरीको इटहरी उपमहानगरपालिका-१३ स्थित रिलायन्स फ्याक्ट्रीको क्वाटरमा बस्दै आएका ४९ वर्षीय तीर्थनारायण यादवको मृत्यु भएको प्रहरीले जनाएको छ ।
प्रहरीका अनुसार फलाम फ्याक्ट्रीबाट कोशी राजमार्गमा निस्किएर दुहबीतर्फ आउँदै गरेको को २७ प ८१३४ नम्बरको मोटरसाइकल र खनारबाट दुहबीतर्फ आउँदै गरेको प्र १-०२-०५२ प ३०५९ नम्बरको मोटरसाइकल एकापसमा ठोक्किँदा दुर्घटना भएको हो ।
दुर्घटनामा गम्भीर घाइते भएका यादवलाई उपचारका लागि विराट मेडिकल कलेज टिचिङ अस्पताल लगिएको थियो । चिकित्सकले जाँच गर्दा उनलाई मृत घोषणा गरिएको प्रहरीले जनाएको छ ।
दुर्घटनामा संलग्न दुवै मोटरसाइकल र को २७ प ८१३४ नम्बरको मोटरसाइकल चालक दुहबी नगरपालिका-८ बस्ने ४५ वर्षीय सुमन राई र प्र १-०२-०५२ प ३०५९ नम्बरको मोटरसाइकल चालक सप्तरीको रुपनी गाउँपालिका-३ घर भई हाल इटहरी-१३ बस्ने ४७ वर्षीय जय नारायण साहलाई इलाका प्रहरी कार्यालय दुहबीले नियन्त्रणमा लिएको छ ।
घटनाबारे थप अनुसन्धान भइरहेको प्रहरीले जनाएको छ ।
Discussion about this post