सुनसरी २ मा राजीव कोइरालाको ‘१० प्रतिबद्धता’ सार्वजनिक, सरकारी सेवामा लाइन र भनसुन अन्त्य गर्ने वाचा

इटहरी : प्रतिनिधिसभा निर्वाचन नजिकिँदै जाँदा नेपाली कांग्रेसबाट सुनसरी २ का उम्मेदवार रहेका राजीव कोइरालाले आफ्नो निर्वाचन क्षेत्रका लागि ‘१० बुँदे प्रतिबद्धता’ सार्वजनिक गरेका छन्।

कोइरालाले सार्वजनिक गरेको प्रतिबद्धतामा सरकारी सेवा सहज बनाउनेदेखि भ्रष्टाचारविरुद्ध शून्य सहनशीलता अपनाउनेसम्मका विषय समेटिएका छन्।

उनले सरकारी कार्यालयमा सेवाग्राहीले बिचौलिया, भनसुन, घुस वा लामो लाइनको झन्झट बेहोर्नु नपर्ने व्यवस्था मिलाउने वाचा गरेका छन्।

त्यस्तै, विकास निर्माण कार्य गुणस्तरीय र समयमै सम्पन्न गराउने, किसानलाई सिँचाइ, बीउ–मल र बजार सुनिश्चित गर्ने तथा स्थानीय बजारलाई चलायमान बनाउने प्रतिबद्धता उनले व्यक्त गरेका छन्।

उनले शिक्षा र रोजगारीका लागि युवालाई बाहिर जानु नपर्ने वातावरण बनाउने, शुद्ध खानेपानी, बिजुली, सडक, शिक्षा र स्वास्थ्यजस्ता आधारभूत सेवा सुनिश्चित गर्ने तथा कला, सीप र ज्ञानको सम्मान गर्ने पनि बताएका छन्।

सामाजिक सद्भाव, धार्मिक सहिष्णुता कायम राख्ने, राष्ट्रघाती सन्धि–सम्झौताको विपक्षमा उभिने र भ्रष्टाचार तथा अनियमितताविरुद्ध कडा अडान लिने उनको अर्को प्रतिबद्धता छ।

निर्वाचनको मुखैमा सार्वजनिक गरिएको यी प्रतिबद्धता मतदातामाझ कत्तिको विश्वासयोग्य ठहरिन्छ भन्ने अबको चुनावी प्रतिस्पर्धामा परीक्षण हुने देखिएको छ।

यस्तो छ कोइरालाले उल्लेख गरेका प्रतिबद्धता –

१. मेरो निर्वाचन क्षेत्रभित्र रहेका सरकारी कार्यालयहरूबाट नागरिकहरूका लागि संविधान र कानुनले दिएको सेवा सुविधा वा अधिकार प्राप्त गर्न कुनै बिचौलियाको भर पर्नु पर्दैन । कुनै भनसुन वा सिफारिस लिन पर्दैन । अतिरिक्त रकम (घुस) दिन पर्दैन, दिनभर लाइनमा बस्नुपर्दैन । सरकारी सेवकहरूबाट चर्को र रूखो बोली व्यवहारको सामना गर्नुपर्दैन।

२. मेरो निर्वाचन क्षेत्रभित्र हुने विकास निर्माण सम्बन्धि कुनै पनि कार्यहरू गुणस्तरहीन हुँदैन । तोकिएको समयसीमा भन्दा बढी समय लम्बिदैन, अनिमियतता र भ्रस्टचारको चलखेल हुँदैन।

३. मेरो निर्वाचन क्षेत्रभित्रका किसानहरूले अ–आफ्नो खेतबारीमा समयमै पर्याप्त सिचाइँ, बप्उ र मलको सुविधा पाउनेछ । उब्जिएको उत्पादनले उचित मूल्य र पर्याप्त बजार प्राप्त गर्नेछ।

४. मेरो निर्वाचन क्षेत्रभित्रका बजारहरू अझ बढी चलायमान हुनेछ।

५. मेरो निर्वाचन क्षेत्रभित्रका विद्यार्थी तथा युवाहरू शिक्षा र रोजगारको लागि अन्यत्र जानुपर्दैन।

६. मेरो निर्वाचन क्षेत्रभित्रका नागरिकहरू शुद्ध खानेपानी, बिजुली, सडक, शिक्षा र स्वास्थ उपचार जस्ता आधारभूत सेवाहरूबाट बन्चित हुने छैनन्।

७. मेरो निर्वाचन क्षेत्रभित्रका नागरिकहरूको कला, सीप, र ज्ञानले उचित प्रोत्साहन, सम्मान र मूल्यांकन प्राप्त गर्नेछ।

८. मेरो निर्वाचन क्षेत्रभित्रको सामाजिक वातावरण सभ्य, सुरक्षित, सद्भावपूर्ण र धार्मिक सहिष्णुताले भरिपूर्ण हुनेछ।

९. म सांसद भूमिकामा कुनैपनि राष्ट्रघाती सन्धि, सम्झौता र विधयकको पक्षमा उभिने छैन।

१०. म सांसद भूमिकामा कुनैपनि भ्रष्टाचार, अनिमियतता र बदनियतविरूद्ध शून्य सहनशीलताको साथ अडान लिनेछु।