इटहरी : कोशी प्रदेशमा हुने प्रतिनिधिसभा निर्वाचनका लागि सुरक्षा संयन्त्रले ‘मास्टर प्लान’ लागू गर्दै बहु–तह सुरक्षा घेरा तयार गरिएको छ।
२८ वटै निर्वाचन क्षेत्रमा भयरहित मतदान सुनिश्चित गर्न नेपाल प्रहरी, सशस्त्र प्रहरी र नेपाली सेनाबीच त्रिपक्षीय समन्वयलाई उच्च प्राथमिकता दिइएको हो।
प्रदेश प्रहरी कार्यालय विराटनगरका अनुसार निर्वाचन सुरक्षामा मात्र ३५ हजार सुरक्षाकर्मी प्रत्यक्ष परिचालन गरिएका छन्। तीमध्ये १२ हजार नेपाल प्रहरी र २३ हजार म्यादी प्रहरी खटिएका छन्। यसबाहेक सशस्त्र प्रहरी बलका तर्फबाट ८ हजारभन्दा बढी जनशक्ति तैनाथ गरिएको छ।
सुरक्षा समितिको मूल्यांकनअनुसार प्रदेशका १ हजार ९०७ मतदान स्थलमध्ये ४३९ स्थललाई अति संवेदनशील सूचीमा राखिएको छ। ती स्थानमा अतिरिक्त सुरक्षा घेरा, निगरानी र गस्तीलाई कडाइ गरिएको छ।
प्रदेश प्रहरी कार्यालय कोशीका प्रमुख डीआइजी विनोद घिमिरेले सानातिना घटनालाई पनि गम्भीरतापूर्वक लिएर तत्काल ‘रेस्पोन्स’ गर्ने गरी मोबाइल टोली र रिजर्भ फोर्स तयारी अवस्थामा राखिएको बताए।
उनका अनुसार सम्भावित जोखिमलाई ध्यानमा राख्दै मतदान अघि, मतदानका दिन र मतगणनासम्म विशेष सुरक्षा योजना लागू हुनेछ।
प्रदेशभर ३५ लाखभन्दा बढी मतदाता
प्रदेशभर ३५ लाख ७४ हजार २८६ मतदाता रहेका छन् भने ४ हजार २७० मतदान केन्द्र कायम छन्। सबै केन्द्रमा सुरक्षाकर्मीको प्रत्यक्ष उपस्थिति रहने र आवश्यक परे थप बल परिचालन गरिने जनाइएको छ।
प्रहरी नेतृत्वका अनुसार हाल समग्र सुरक्षा अवस्था सन्तोषजनक रहेको छ र मतदाताले ढुक्क भएर मतदान गर्न सक्ने वातावरण तयार गरिएको छ।
यसपटकको निर्वाचनमा सुरक्षाको रणनीति ‘दृश्य र अदृश्य’ दुवै किसिमले कडा बनाइएको दाबी सुरक्षा निकायको छ। जसले मतदान प्रक्रिया शान्तिपूर्ण, निष्पक्ष र व्यवस्थित बनाउन महत्वपूर्ण भूमिका खेल्ने अपेक्षा गरिएको छ।
Discussion about this post