भोजपुर : भोजपुरको उत्तरी क्षेत्रस्थित षडानन्द नगरपालिकामा सञ्चालित लोमा खोला खानेपानी आयोजनाले ‘एक घर एक धारा’ अभियानलाई मूर्तरूप दिन थालेको छ। आयोजनामार्फत हालसम्म करिब एक हजार २०० घरधुरीमा धारा जडान भइसकेको छ भने बाँकी परिवारमा पनि क्रमशः पानी वितरणको तयारी भइरहेको छ।
वर्षौंदेखि सुरक्षित पिउने पानीको अभाव झेल्दै आएका स्थानीय बासिन्दाले घरआँगनमै धारा पुगेपछि राहत महसुस गर्न थालेका छन्। लोमा खोला खानेपानी आयोजना अन्तर्गत नगरपालिकाका ८, ९, १०, ११ र १२ नम्बर वडाका करिब एक हजार ५०० परिवारलाई लक्षित गरी काम भइरहेको छ।
निर्माण उपभोक्ता समितिका अध्यक्ष राजनविक्रम राईका अनुसार हालसम्म करिब एक हजार ५०० लक्षित परिवारमध्ये एक हजार २०० घरमा धारा जडान सम्पन्न भइसकेको छ। बाँकी घरधुरीमा पनि चरणबद्ध रूपमा पानी वितरण गरिने तयारी गरिएको छ।
उनका अनुसार आयोजनाको मुख्य संरचना निर्माणसँगै वितरण प्रणाली विस्तारको कामलाई तीव्रता दिइएको छ।
तर मुहान क्षेत्रमा पानी शुद्धीकरण गर्ने प्रविधि जडान नभएका कारण बर्सातको समयमा केही प्राविधिक समस्या देखिने गरेको छ। वर्षायाममा बालुवा र गिट्टी बगेर आउने तथा धारामा अवरोध सिर्जना हुने समस्या रहेको समितिको भनाइ छ।
स्थानीयवासी छत्रमाया कार्कीले घरमै धारा जडान भएपछि वर्षौंदेखिको सास्ती अन्त्य भएको बताइन्। पानीको जोहो गर्न घण्टौँ समय खर्चिनुपर्ने बाध्यता हटेको उनको अनुभव छ।
“एक गाग्री पानी ल्याउन दुई–चार घण्टा लाग्थ्यो,” उनले भनिन्, “अहिले घरको आँगनमै धारा छ। पानीको चिन्ता हटेको छ।”
स्थानीय तिलबहादुर श्रेष्ठले पनि खानेपानी सुविधाले गाउँको दैनिकी नै बदलिएको बताए। उनका अनुसार गाईभैँसीलाई पानी खुवाउन, सरसफाइ गर्न र दैनिक घरेलु कामकाजमा सहजता आएको छ।
षडानन्द नगरपालिकाले आयोजनालाई प्राथमिकताका साथ अघि बढाएको जनाएको छ। नगर प्रमुख सुरेन्द्रकुमार उदासका अनुसार यो नगरपालिकाभित्र सञ्चालनमा रहेको ठूलो र बहुप्रतीक्षित खानेपानी आयोजना हो।
उनले आयोजना समयमै सम्पन्न गर्न आवश्यक बजेट व्यवस्थापनका लागि सम्बन्धित निकायसँग समन्वय भइरहेको बताए। उनका अनुसार आयोजनाले पूरा आकार लिएपछि हजारौँ नागरिकले शुद्ध पिउने पानीको सुविधा पाउनेछन्।
खानेपानी तथा सरसफाइ डिभिजन कार्यालय भोजपुरका इन्जिनियर दीपक यादवका अनुसार आयोजनाको भौतिक प्रगति हालसम्म करिब ८० प्रतिशत पुगेको छ। अब करिब २८५ घरधुरीमा पानी वितरण गर्न बाँकी रहेको तथा पानी शुद्धीकरण संयन्त्र निर्माण गर्नुपर्ने अवस्था रहेको उनले बताए।
चालु आर्थिक वर्षमा तीन वटा ट्याङ्की, चार वटा डीपीटी तथा तीन वटा वितरण च्याम्बर निर्माण गरिएको कार्यालयले जनाएको छ। साथै दुई हजार १०० मिटर मुख्य पाइप लाइन र ३७ हजार मिटर वितरण लाइन विस्तारको काम सम्पन्न भएको छ।
दुई स्किममा सञ्चालन भइरहेको यस आयोजनाअन्तर्गत मुख्य पाइप लाइनको लम्बाइ करिब ४७ किलोमिटर तथा वितरण लाइन करिब १५३ किलोमिटर रहेको जनाइएको छ। श्रमदानसहित आयोजनाको कुल अनुमानित लागत २६ करोड ८२ लाख ३० हजार ८३५ रुपैयाँ रहेको छ।
आर्थिक वर्ष २०७५/७६ बाट सुरु भएको लोमा खोला खानेपानी आयोजनाले ग्रामीण बस्तीमा आधारभूत सेवाको पहुँच विस्तार गर्नुका साथै जनजीवनको गुणस्तर सुधारमा समेत महत्वपूर्ण योगदान पुर्याएको देखिएको छ।
खानेपानीको अभावले प्रभावित क्षेत्रका बासिन्दाका लागि यो आयोजना केवल पूर्वाधार विकासको विषय मात्र नभई जीवनशैली परिवर्तनको आधार बनेको छ।
Discussion about this post