इटहरी : उद्योग वाणिज्य संघ इटहरीको आगामी नेतृत्व चयनका लागि अध्यक्ष पदमा नवराज काफ्ले र गायत्री कटवाल भण्डारीले उम्मेदवारी दर्ता गराएका छन्।
बिहीबार संघको कार्यालयमा दुवै पक्षले आफ्नो प्यानलसहित उम्मेदवारी दर्ता गराएपछि चुनावी प्रतिस्पर्धा औपचारिक रूपमा सुरु भएको छ।
उद्योगी–व्यवसायीहरूको छाता संगठनका रूपमा रहेको संघको नयाँ नेतृत्व चयनका लागि असार २७ गते निर्वाचन हुँदैछ।
निर्वाचनलाई व्यवसायिक नेतृत्व चयनको प्रक्रिया भनिए पनि यसपटक विभिन्न राजनीतिक दल निकट व्यवसायी समूहहरूको सक्रियताले चुनावलाई थप रोचक बनाएको छ।
निर्वाचनमा अध्यक्ष पदका उम्मेदवार नवराज काफ्लेले आफू व्यवसायीहरूको साझा हित, संस्थागत सुदृढीकरण तथा निजी क्षेत्रका समस्याको समाधानलाई प्राथमिकतामा राखेर चुनावी मैदानमा उत्रिएको बताएका छन्।
काफ्ले समूहलाई नेपाली कांग्रेस र नेकपा एमाले निकट व्यवसायीहरूको नैतिक समर्थन रहेको जनाइएको छ।
यता, गायत्री कटवाल भण्डारीले महिला नेतृत्व, व्यवसायीहरूको क्षमता विकास तथा उद्योग–व्यापारमैत्री वातावरण निर्माणलाई आफ्नो प्राथमिकता रहेको बताएकी छन्।
उनको समूहलाई नेकपा माओवादी केन्द्र र राष्ट्रिय स्वतन्त्र पार्टी (रास्वपा) निकट व्यवसायीहरूको समर्थन रहेको बताइएको छ।
उम्मेदवारी दर्तापछि दुवै पक्षले चुनावी अभियानलाई तीव्र बनाउने तयारी गरेका छन्। व्यवसायी समुदायभित्र मतदाता भेटघाट, प्रतिबद्धता सार्वजनिक गर्ने तथा आफ्ना एजेन्डा प्रस्तुत गर्ने कार्यक्रमहरू सुरु भइसकेका छन्।
निर्वाचन समितिका संयोजक टंक दुलालका अनुसार उम्मेदवारी दर्ताको प्रक्रिया सम्पन्न भएको छ। उम्मेदवारहरूको प्रारम्भिक नामावली शुक्रबार बिहान सार्वजनिक गरिनेछ भने दाबी–विरोध, नाम फिर्ता लगायतका प्रक्रिया निर्वाचन कार्यतालिकाअनुसार अघि बढ्नेछन्।
इटहरीको व्यवसायिक क्षेत्रको प्रतिनिधित्व गर्ने महत्वपूर्ण संस्थाको नेतृत्वका लागि हुने यो निर्वाचनलाई स्थानीय उद्योगी–व्यवसायीहरूले चासोका साथ हेरिरहेका छन्।
अध्यक्षसहित अन्य पदमा पनि प्रतिस्पर्धा हुने भएकाले चुनावी माहोल क्रमशः तातिँदै गएको छ।
Discussion about this post