इलाम : लगातारको वर्षासँगै सडक सञ्जाल ध्वस्त भएपछि इलाम गम्भीर मानवीय तथा आर्थिक संकटमा परेको भन्दै व्यवसायीहरूले सरकारले तत्काल राहत तथा विशेष सहायता कार्यक्रम घोषणा गर्न माग गरेका छन्।
कोशी होटल व्यवसायी महासंघ, कोशी प्रदेशका महासचिव वासुदेव बरालले विज्ञप्ति जारी गर्दै मेची राजमार्गअन्तर्गत राजदुवाली सडकखण्ड पूर्ण रूपमा क्षतिग्रस्त भएको र वैकल्पिक बेलासे–इलाम सडकखण्डको माइखोलामा रहेको पुल तथा अस्थायी कजवे पनि बाढीले बगाएपछि इलामको यातायात सम्पर्क विच्छेद भएको बताएका छन्।
महासंघका अनुसार सडक अवरुद्ध भएसँगै अत्यावश्यक खाद्यान्न, खाना पकाउने ग्यास, पेट्रोलियम पदार्थलगायत सामग्रीको आपूर्ति रोकिएको छ। तीन दिनदेखि विद्युत् सेवा अवरुद्ध हुँदा दुई दिनयता खानेपानी वितरणसमेत बन्द भएको जनाइएको छ।
यातायात अवरुद्ध भएपछि गम्भीर बिरामी उपचारका लागि अस्पताल पुग्न नसकेको, कृषकको उत्पादन बजारसम्म लैजान नपाउँदा खेतबारीमै नष्ट हुने अवस्था आएको तथा बजारमा उपभोग्य वस्तुको अभाव बढेको महासंघले जनाएको छ।
पर्यटन पूर्ण रूपमा ठप्प हुँदा होटल, यातायात र अन्य व्यवसायसमेत प्रभावित भएका छन्।
आर्थिक वर्षको अन्त्यमा बैंकको ऋण असुली, घरभाडा र अन्य आर्थिक दायित्वले व्यवसायी थप संकटमा परेको उल्लेख गर्दै महासंघले इलामलाई संकटग्रस्त क्षेत्र घोषणा गरी राहत प्याकेज ल्याउन सरकारसँग माग गरेको छ।
महासंघले विद्युत्, खानेपानी र इन्धनको आपूर्ति तत्काल सहज बनाउन, बैंक ब्याज तथा घरभाडामा सहुलियत दिन र व्यवसायीलाई विस्थापित हुनबाट जोगाउन स्थानीय, प्रदेश र संघीय सरकारसँग आग्रह गरेको छ।
Discussion about this post