मोरङ : मोरङको धनपालथान गाउँपालिकामा साथीसँग खेल्न गएकी एक १२ वर्षीया बालिकाको पोखरीमा डुबेर मृत्यु भएको छ।
शनिबार दिउँसो धनपालथान गाउँपालिका–३ का जोगन मुर्मूकी छोरी जेविना मुर्मू घरबाट केही साथीहरूसँग खेल्न निस्किएकी थिइन्। खेल्ने क्रममा उनी गाउँकै दिनेश मण्डलको पोखरीमा डुबेको प्रहरीले जनाएको छ।
बालिकासँग रहेका साथीहरूले घटना देखेपछि स्थानीयलाई खबर गरेका थिए।
त्यसपछि स्थानीयले तत्काल पोखरीबाट बालिकालाई बाहिर निकाले पनि उनको ज्यान बचाउन सकेनन्। शव घरमा ल्याइएपछि घटनाको जानकारी पाएर प्रहरी पुगेको थियो।
इलाका प्रहरी कार्यालय रंगेलीका प्रहरी निरीक्षक अशोककुमार झाको नेतृत्वमा पुगेको टोलीले कानुनी प्रक्रिया पूरा गरी शव पोस्टमार्टमका लागि रंगेली अस्पताल पठाएको छ।
प्रहरीले घटनाबारे थप अनुसन्धान गरिरहेको जनाएको छ।
Discussion about this post