इटहरी : सुनसरीको देवानगञ्ज गाउँपालिका–३ कप्तानगञ्जमा दुई समुदायबीच भएको हिंसात्मक झडपपछि उत्पन्न तनाव नियन्त्रणमा लिन नेपाली सेना परिचालन गरिएको छ।
आइतबार रातिदेखि सुरु भएको हिंसात्मक घटनापछि नेपाल प्रहरी र सशस्त्र प्रहरीको ठूलो संख्या परिचालन गरिए पनि अवस्था पूर्ण रूपमा नियन्त्रणमा आउन नसकेपछि स्थानीय प्रशासनले नेपाली सेनालाई समेत परिचालन गरेको हो।
कप्तानगञ्जसहित घुस्की, भुटाहा र देवानगञ्ज बजार क्षेत्रमा जारी अनिश्चितकालीन कर्फ्युका बीच सोमबार प्रदर्शनकारीले टायर बाल्ने, तोडफोड तथा आगजनी गरेपछि सुरक्षा व्यवस्था थप कडा पारिएको छ। कोशी प्रदेशका विभिन्न जिल्लाबाट नेपाल प्रहरी, सशस्त्र प्रहरी र दंगा नियन्त्रण टोलीसमेत घटनास्थलमा पठाइएको छ।
सुरक्षा निकायले संवेदनशील क्षेत्रहरूमा संयुक्त गस्ती बढाएको छ भने कुनै पनि अप्रिय घटना हुन नदिन सेना, नेपाल प्रहरी र सशस्त्र प्रहरीको संयुक्त परिचालन जारी रहेको जनाएको छ।
आइतबार राति झडप नियन्त्रणका क्रममा सुरक्षाकर्मीले चलाएको गोली लागेर देवानगञ्ज–३ का २४ वर्षीय ओमप्रकाश मेहताको मृत्यु भएको थियो।
घटनामा नौ जना गोली लागेर घाइते भएका छन् भने सर्वसाधारण र सुरक्षाकर्मीसहित २२ जनाभन्दा बढी घाइते भएका छन्।
घाइतेहरूको विराटनगर र इनरुवास्थित विभिन्न अस्पतालमा उपचार भइरहेको छ।
जिल्ला सुरक्षा समितिले सुरक्षा अवस्थाको निरन्तर समीक्षा गरिरहेको छ भने प्रशासनले सर्वसाधारणलाई कर्फ्यु आदेशको पूर्ण पालना गर्न आग्रह गरेको छ।
Discussion about this post