इटहरी : सुनसरीको देवानगञ्ज गाउँपालिका–३ कप्तानगञ्जमा भएको हिंसात्मक घटनापछि सामाजिक सद्भाव कायम राख्ने उद्देश्यले नागरिक समाजको अगुवाइमा बुधबार इटहरीमा सद्भाव र्याली निकालिएको छ।
इटहरीको मुख्य चोकबाट सुरु भएको र्यालीमा विभिन्न भाषा, जाति, धर्म तथा समुदायका नागरिक, बुद्धिजीवी, सामाजिक अभियन्ता, व्यवसायी, युवा र महिलाहरूको उल्लेखनीय सहभागिता रहेको थियो। सहभागीहरूले हातमा शान्ति र सद्भावका सन्देश लेखिएका प्लेकार्ड बोकेर नगर परिक्रमा गरेका थिए।
र्यालीका क्रममा सहभागीहरूले ‘नेपालमा फेरि बुद्ध जन्माइदेऊ’, ‘हिंसा होइन, शान्ति चाहिन्छ’, ‘सद्भाव कायम गरौं’, ‘जातीय र धार्मिक सद्भाव जोगाऔं’ लगायतका सन्देश प्रवाह गरेका थिए।
उनीहरूले कुनै पनि घटनालाई जातीय वा धार्मिक द्वन्द्वमा रूपान्तरण गर्न नहुने भन्दै सामाजिक एकता कायम राख्न सबैलाई आग्रह गरेका थिए।
र्यालीमा सहभागी नागरिक समाजका अगुवाहरूले सुनसरीको घटनाले समाजमा अविश्वास र विभाजन बढ्न नदिन सबै पक्ष संयमित हुनुपर्ने धारणा राखे।
उनीहरूले घटनाको निष्पक्ष छानबिन गरी दोषीलाई कानुनी दायरामा ल्याउनुपर्ने, तर त्यसको नाममा समुदाय–समुदायबीच वैमनस्य फैलाउने गतिविधि स्वीकार्य नहुने बताए।
उनीहरूले सामाजिक सञ्जालमा फैलाइने अपुष्ट सूचना, भ्रामक प्रचार तथा उत्तेजनात्मक अभिव्यक्तिबाट सचेत रहन पनि आग्रह गरे। सत्यतथ्य पुष्टि नभएका सामग्रीले समाजमा थप तनाव सिर्जना गर्ने भएकाले जिम्मेवार व्यवहार गर्नुपर्ने उनीहरूको भनाइ थियो।
सुनसरीको देवानगञ्जमा आइतबार राति दुई समूहबीच भएको झडप नियन्त्रणका क्रममा प्रहरीको गोली लागेर एक जनाको मृत्यु भएपछि त्यस क्षेत्र तनावग्रस्त बनेको थियो।
घटनापछि विभिन्न स्थानमा प्रदर्शन, आगजनी तथा तोडफोडका घटना भएका थिए भने प्रशासनले कर्फ्यु र निषेधाज्ञा लागू गरी नेपाल प्रहरी, सशस्त्र प्रहरी बल र नेपाली सेनालाई परिचालन गरेको थियो।
यही पृष्ठभूमिमा इटहरीमा आयोजित सद्भाव र्यालीमा सहभागीहरूले हिंसाको अन्त्य, संवादको संस्कृति र सामाजिक सद्भावलाई सुदृढ बनाउन सबै नागरिकले आ–आफ्नो ठाउँबाट सकारात्मक भूमिका निर्वाह गर्नुपर्नेमा जोड दिएका छन्।
Discussion about this post