उदयपुर । उदयपुरको बेलका नगरपालिका–८ स्थित बोफताङ डाँडानजिक जमिन धसिएर शुक्रबार राति गएको पहिरोले स्थानीयका तीनवटा घर बगाएको छ ।
बेलका नगरपालिकाका नगरप्रमुख अशोक कार्कीका अनुसार गाउँको माथिबाट जमिन नै धसिएर आएको पहिरोले मेहेरमान राई, वीरसिंह राई र बमप्रसाद राईका घर बगाएको हो ।
पीडितमध्येका मेहेरमान राईलाई राति नै पहिरोले घरसँगै करिब चार सय मिटर तल बगाएर लगे पनि उनी शनिबार बिहान सकुशल सम्पर्कमा आउनु भएको नगरप्रमुख कार्कीले बतए ।
पहिरोमा तीनवटा घर बग्नुका साथै अन्य सातवटा घरसमेत जोखिममा रहेकाले ती घरका परिवारलाई सुरक्षित स्थानमा स्थानान्तरण गर्नुपर्ने अवस्था रहेको नगरप्रमुख कार्कीले जानकारी दिए ।
कार्कीका अनुसार ती घरहरु केही अप्ठेरो ठाउँमा रहेको र घरमाथिबाट वर्षाका कारण जमिन गलेर भासिएपछि घरहरु बगाएको भए पनि घरका मानिस भने सबै सुरक्षित रहेका छन् । उनीहरुलाई सुरक्षित स्थान खोजेर सार्ने प्रयास नगरपालिकाले गरिरहेको छ ।
Discussion about this post