विराटनगर । लगातारको वर्षाका कारण बाढी, पहिरो र डुबानको जोखिम बढेपछि कोशी प्रदेशका पहाडी तथा हिमाली जिल्लामा रातिको यात्रा, सवारी सञ्चालन तथा पदयात्रामा कडाइ गरिएको छ ।
जल तथा मौसम विज्ञान विभाग तथा राष्ट्रिय विपद् जोखिम न्यूनीकरण तथा व्यवस्थापन प्राधिकरणको पूर्वानुमानअनुसार कोशी प्रदेशका पहाडी क्षेत्रमा भारी वर्षाको सम्भावना रहेकाले स्थानीय प्रशासनले उच्च सतर्कता अपनाउँदै जोखिम न्यूनीकरणका लागि विभिन्न निर्णय गरेका हुन् ।
धनकुटामा रातिको समयमा सवारी सञ्चालनमा रोक लगाइएको छ । भोजपुरमा अत्यावश्यकबाहेक रातिको समयमा कच्ची सडकमा यात्रा नगर्न र सवारी चालकलाई विशेष सावधानी अपनाउन आग्रह गरिएको छ ।
सङ्खुवासभामा मुख्य राजमार्गबाहेक भित्री कच्ची सडकमा साँझ ६ बजेपछि सवारी सञ्चालनमा रोक लगाइएको छ । नदी तथा खोलाको किनारमा रहेका होटल तथा रेस्टुरेन्टमा रातिको समयमा जमघट गर्न र माछा मार्नसमेत रोक लगाइएको प्रशासनले जनाएको छ ।
यसैगरी, ताप्लेजुङमा कञ्चनजङ्घा संरक्षण क्षेत्रमा पदयात्रा तथा भ्रमणमा रहेका स्वदेशी तथा विदेशी पर्यटकलाई यात्रा स्थगित गरी सुरक्षित स्थानमा बस्न वा फर्किन आग्रह गरिएको छ ।
सोलुखुम्बुमा पनि पहिरो तथा बाढीको जोखिमलाई मध्यनजर गर्दै साँझ ६ बजेदेखि बिहान ६ बजेसम्म ग्रामीण तथा भित्री सडकमा सवारी सञ्चालनमा पूर्ण रोक लगाइएको छ । प्रशासनले नदी किनार तथा पहिरोको जोखिम भएका क्षेत्रमा सवारी पार्किङ नगर्नसमेत यातायात व्यवसायीलाई आग्रह गरेको छ ।
उदयपुर, खोटाङ, तेह्रथुम र पाँचथरमा समेत जोखिमयुक्त क्षेत्र पहिचान गरी स्थानीय बासिन्दालाई सतर्क रहन तथा अत्यावश्यकबाहेक लामो दूरी र रातिको यात्रा नगर्न आग्रह गरिएको छ ।
लगातारको वर्षाका कारण तमोर, अरुण, दूधकोशी लगायतका नदी तथा खोलामा आकस्मिक बाढी आउन सक्ने र पहाडी क्षेत्रमा पहिरो तथा गेग्रान बहावको जोखिम बढेकाले प्रशासनले उच्च सतर्कता अपनाएको जनाएको छ । विपद्को सम्भावित जोखिम भएका बस्तीका नागरिकलाई सुरक्षित स्थानमा सर्नसमेत आग्रह गरिएको छ ।
कोशी प्रदेश सरकारले सुरक्षा निकायलाई उच्च सतर्क अवस्थामा राख्दै सम्भावित जोखिमयुक्त क्षेत्रमा उद्धार तथा राहतका लागि आवश्यक तयारी गरिएको जनाएको छ ।
Discussion about this post