स्थानीय तहमा समायोजित अधिकृतको गुनासो : संघको जुनियर अधिकृत आए हाकिम !

इटहरी : मुलुक संघीय संरचनामा गई सकेपश्चात् आम चासो बनेको विषय थियो – कर्मचारी व्यवस्थापन ।

यसरी संघीय संरचनामा कर्मचारीको व्यवस्थापन गर्न बनेको तत्कालिन नेकपा सरकार कर्मचारी अध्यादेश २०७५ जारी भयो । र, यसको कर्मचारीस्तरबाट विरोध पनि भयो । तर, मन्त्रिषरिषद्ले प्रशासन सेवा सामान्य प्रशासन समूहको दरबन्दी बढाएसंगै विरोध एकाएक सेलायो ।

एकातर्फ कर्मचारी समायोजनमा पीडित बने प्रशासन सेवा, लेखा समूह र शिक्षा सेवा । जसमध्ये अधिकृत कर्मचारीहरु अझ बढी मारमा परेका छन् ।

समायोजनका बखत सानो समूहले गरेको विरोध कहिँ कतैबाट सम्बोधन भएन । बरु उल्टै मन्त्रालयबाट धम्कीपूर्ण सूचना जारी गरिए । अध्यादेशमा भएका रोज्नुपर्ने तह नरोजेमा जुनसुकै तहमा समायोजन गर्ने नियमलाई प्रकाश पारी पारी सूचना जारी गर्दै कर्मचारीलाई समायोजन फाराममा धेरै भन्दा धेरै तहहरु रोज्न बाध्य बनाइयो ।

यसबेला समायोजित भएका अधिकृत कर्मचारीहरुमध्ये गाउँपालिकामा समायोजन भएका अधिकृत कर्मचारीलाई आफूभन्दा जुनियर संघको अधिकृत हाकिम भएर आउने समस्याले पिरोल्न थालेको छ । यस्तो समस्या हुनेमा काभ्रे जिल्लाको रोशी गाउँपालिका रहेको छ ।

उक्त पालिकमा २०७४ सालमा खुला प्रतिस्पर्धाबाट लेखा अधिकृतमा स्थायी नियुक्ति भएकी लेखा अधिकृत सुमित्रा पौडेल अधिकृतस्तर सातौं तहमा समायोजन भइ दुई वर्षदेखि कार्यरत छिन् । सोही पालिकामा २०६९ सालमा शिक्षा सेवाको शाखा अधिकृत नियुक्ति भएका रामबहादुर तामाङ्ग समायोजन पश्चात अधिकृतस्तर आठौं तहमा कार्यरत छन् ।

तर, हाल उक्त पालिकामा २०७७।०३।०९ गते नायब सुब्बाबाट जेष्ठ तथा कार्यसम्पादनका आधारमा बढुवा भई अधिकृत भएका अधिकृत पर्शुराम थापालाई संघीय मामिला तथा सामान्य प्रशासन मन्त्रालयले २०७८।०४।०१ को मितिमा प्रमुख प्रशासकीय अधिकृतको कामकाजका लागि पठाएको छ ।

यसरी समायोजनका बखत जुनियर अधिकृतलाई हाकिम बनाएर पठाउँदा कर्मचारीहरुको मनोबल कमजोर रहन जान्छ । सोही कारण संगठनलाई कर्मचारीले सोचेअनुरुप काम दिन कठीन हुन्छ ।

यो व्यवस्थाले आजको खरिदार पदको कर्मचारी, शाखा अधिकृतमा बढुवा भई हाकिम भएर आउने व्यवस्था हुनुले कर्मचारीहरुमा निरुत्साहन हुन्छ । कर्मचारीहरुको उपसचिव पदमा बढुवा हुने कुनै माध्यम नै छैन । र, संघमा दरबन्दी नै कम छ ।