तरहराका सईको दादागिरी (भिडियोसहित)

तरहरा : तरहरा प्रहरी चौकीका इन्चार्ज प्रहरी नायव निरीक्षक चन्द्र शाक्यले स्थानीय व्यापारीहरुलाई जथाभावी दुःख दिएको व्यापारीहरुले आरोप लगाएका छन् ।

इटहरी २ बरगाछीका बिनोद ढकाललाई केही दिन अगाडि प्रहरीले जबरजस्ती पक्राउ गरी जंगल–जंगल घुमाएको बताए । आँफूले खसीको मासु काट्ने क्रममा जबरजस्ती प्रहरीले पक्राउ गरी आफूँले लगाएको टिसर्ट पनि च्यातिदिएको र आँफूहरुलाई त्रसितमा राखेको बताए ।

उनले टाकुरान्यूजसँग भने, ‘मलाई खाना खादैँ गर्दा नै प्रहरीले पक्राउ गरी जबरजस्ती रुपमा प्रहरीले पक्राउ गरी जंगल–जंगल घुमायो ।’ प्रहरीले सुरक्षा दिनुपर्ने भएपनि जथाभावी रुपमा पक्राउ गरी दुःख दिएको उनको भनाई थियो ।

ढकाल एक पात्र मात्र हुन् । तरहरा प्रहरीका सई चन्द्र शाक्यले पटक–पटक सब्जी व्यापारीदेखि सर्वसाधारणलाई यसअघि देखि नै त्रास देखाउँदै आएको व्यापारीदेखि सर्वसाधारणहरु गुनासो गर्छन् ।

स्थानीय प्रेम कार्कीले जनतालाई हप्काउने गरेको आरोप लगाए । ‘हामीले बाँच्ने अधिकार छ, प्रशासनले जनतालाई सम्झाउनु, बुझाउनुपर्ने भएपनि प्रहरी प्रशासनले जथाभावी दुःख दिईरहेको छ,’ उनले भने, ‘त्यो दिनको धम्कीले हामी त्रसित छौँ, प्रहरीले सुरक्षा दिनुपर्ने हो कि त्रास ?’

स्थानीय दीपेन्द्र घिमिरेले भने तरहरा प्रहरीले यसअघि देखि नै स्थानीयलाई दुःख दिईरहेको बताए । सामान्य विवादमै प्रहरीले धम्की दिने जस्ता कुराले साना व्यापारीलाई मार्ने नीति देखिएको उनको भनाई थियो । ‘ठूला व्यापारीहरुलाई भने छुट छ,’ उनले भने, ‘यसमा प्रहरी प्रशासनको ज्यादती देखिन्छ, यसमा समानता हुन आवश्यक रहेको छ ।’

उता, उद्योग बाणिज्य संघ तरहरा शाखाका अध्यक्ष सुदर्शन खड्काले भने व्यवसायीहरुमा परेको असरप्रति भत्र्सना गरिने बताए । उनले भने, ‘प्रशासनले सबैलाई सम्झाएर काम गर्नुपर्छ भन्ने हाम्रो धारणा हो, सरकारले लकडाउन गरेर मात्र कोरोना भाइरस हट्ने हैन, हामीले सटर झारेर कतिदिनसम्म बस्ने ?’

उनले अहिले बैँकले दुःख दिईरहेको बताए । बैँकले तारन्तार ब्याज माग्नका लागि व्यवसायीहरुलाई दुःख दिएको उनको भनाई रहेको थियो ।

यता, इटहरी २० का वडाध्यक्ष मणिराम श्रेष्ठले भने सरकारको नीति स्थानीयले मान्नुपर्ने बताए । ‘हामीले चाहेर पनि व्यवसायको हितमा काम गर्न सकिरहेका छैनौँ,’ उनले भने, ‘परिस्थिति अनुसार चल्नुपर्ने हुन्छ, बिस्तारै सहज बन्दै जान्छ भन्ने आशा गरौँ ।’

उनले प्रहरी प्रशासनले व्यापारीहरुलाई जथाभावी दुःख दिएको बिषयमा भने आँफूलाई जानकारी नभएको र यस बिषयमा आँफू गम्भीर हुने प्रतिक्रिया दिए ।

तरहरा प्रहरीले दुई दिन अगाडि इटहरी २ का बिनोद ढकाल र इटहरी २० का गोपाल चौहानलाई मनपरी ढंगले पक्राउ गरेको थियो । उक्त बिषयमा शुक्रबार स्थानीय व्यापारी, वडा र प्रहरी प्रशासनसँग बैठक समेत बसिएको छ । स्थानीय व्यापारीहरुले सबैलाई एउटै नीति लागू हुनुपर्ने बताएका थिए ।

उनीहरुले कसैलाई तल र कसैलाई माथि पारिएको आरोप लगाए ।

यस बिषयमा प्रहरी नायव निरीक्षक शाक्यलाई टेलिफोन गरी बुझ्दा उनले झुटो प्रचार गरिएको भन्दै आफ्नो बचाउ गरे । उनले भने, ‘मान्छेहरुले होटल सञ्चालन गर्न नपाएपछि रुष्ट छन्, पक्राउ भन्दा पनि पसल बन्द गर्नुहोस् भनेका हौँ ।’ उनले एक डेढ घण्टा नियन्त्रणमा लिएर सम्झाएर छाडिएको बताए ।

‘माथिबाट होटल रेष्टुरेन्ट खोल्न निर्देशन, अनुमति छैन,’ उनले भने, ‘व्यापारीहरु पसल खोल्न नदिएपछि हामीसँग खुशी होलान् त ?’

हेर्नुहोस् भिडियो