इटहरी : पूर्व क्षेत्रीय ट्राफिक प्रहरी कार्यालय प्रदेश १ का प्रमुख प्रहरी उपरीक्षक (एसपी) सञ्जीव शर्माले ट्राफिक प्रहरीसँग आम मानिस त्रसित हुने अवस्था अन्त्य हुने बताएका छन् ।
भर्खरै सरुवा भएर आएका एसपी शर्माले बिहीबार टाकुरासँग कुरा गर्दै भने, ‘आम सर्वसाधारणले ट्राफिकसँग डराएर भाग्ने स्थितिको अन्त्य हुन्छ, सुरक्षित महसुस हुने वातावरण सृजना गर्छु ।’
सर्वसाधारण मानिसहरुले ट्राफिक प्रहरीले घुस माग्ने, असभ्य भाषा प्रयोग गर्ने जस्ता कुरा निर्मूलीकरण हुने तर्क गरे । भने, ‘सभ्य, शीष्ट भाषा प्रयोग हुने र आम मानिस ट्राफिकसँग भागेर हिड्ने दिन अन्त्य हुन्छ ।’ उनले गत बर्षको भन्दा यो आर्थिक बर्षमा दुर्घटना न्यूनीकरण भएको बताए ।
‘राती मापसे गरेर, तीब्र गतिमा तथा मोटरसाईकलमा तीनजना सवार भएको खण्डमा दुर्घटना ज्यादा हुने गरेको छ,’ शर्माले भने, ‘प्रहरीसँग झुट बोलेर, भागेर हिड्ने क्रममा पनि दुर्घटना हुने गरेको छ ।’
उनले सडकमा धेरै खाल्डाखुल्डी हुने र सठक मर्मत नहुँदा दुर्घटना हुने गरेको बताए । आगामी बर्षदेखि दुर्घटना न्यूनीकरण गर्नका लागि हामीले विशेष कार्यक्रम र सचेतनामुलक कार्यक्रमको पनि आयोजना गर्ने उनले बताए ।
आर्थिक बर्ष २०७५।०७६ को तुलनामा २०७६।०७७ मा दुर्घटनामा केही कम भएको शर्माले बताए । उनका अनुसार आर्थिक बर्ष ०७५।७६ मा १ हजार २९८ वटा सवारी दुर्घटना हुँदा ३७३ जनाको मृत्यु भएको थियो भने २ हजार ३२५ जना मानिस घाईते भएका थिए ।
त्यस्तै, आर्थिक बर्ष ०७६।७७ मा भने १ हजार २६१ वटा सवारी दुर्घटना हुँदा ३२६ जनाको मृत्यु भएको छ भने २ हजार १०५ जना मानिस घाईते भएका थिए । दुर्घटनामा सबैभन्दा बढी ज्यान गुमाउने पुरुष रहेका छन् ।
यो आर्थिक बर्षमा दुर्घटनामा २५७ जना पुरुष, ४९ जना महिला र २० जना बालबालिका रहेका छन् ।
दुर्घटना हुने सवारीमध्ये सबैभन्दा बढी मोटरसाईकल रहेका छन् । यो बर्ष ७९१ वटा मोटरसाईकल दुर्घटना भएको ट्राफिक प्रहरीको तथ्याङ्कमा देखिन्छ ।
त्यस्तै, कार जीप गरी २१९, बस १४०, ट्याक्टर १३५, ट्रक ११९, टेम्पो १११ र साईकल रिक्सा गरी १२६ वटा सवारी दुर्घटना भएका छन् ।
आगामी बर्षमा भने दुर्घटना न्यूनीकरणमा ट्राफिक प्रहरीले अब्बल भूमिका निर्वाह गर्ने एसपी शर्माको तर्क थियो ।
Discussion about this post