इटहरी उपमहानगरपालिकाले कोरोना भाइरसको पीसीआर परीक्षणका लागि स्वाव संकलनलाई तीव्रता दिने जनाएको छ ।
केही दिनयता संक्रमितको संख्या बढ्दै गएकाले संक्रमितका सम्पर्कमा आएका ब्यक्तिहरु, उपमहानगरका जनप्रतिनिधि र कर्मचारीहरु तथा प्रत्येक वडावाट तत्काललाई १०–१० जना गरेर स्वाब संकलन सुरु गरिसकिएको उपमहानगरपालिकाले जनाएको छ ।
साउन १५ गते ७८ जना, १६ गते ७२ जना, १७ गते ६६ जना, १८ गते ५६ जना र १९ गते ८० जना गरि १५ गते यता मात्र ३ सय ५२ जनाको स्वाव संकलन गरेर परीक्षणका लागि पठाइएको इटहरी उपमहानगरपालिकाका सञ्चार संयोजक लिलाराज भट्टराईले जानकारी दिए ।
त्यसमध्ये पछिल्लो पुष्टि भएका फर्निचर उद्योगका काम गर्ने इटहरी ५ का एक ब्यक्ति सहित पाँच जनामा कोरोना संक्रमण पुष्टि भएको छ ।
परीक्षणको दायरा बढाईएपनि रिपोर्ट ढिला आउँने भएकाले समस्या रहेको भट्टराईले बताए ।
उनले भने, ‘अहिले दुईवटा विकल्प छन्, एउटा भनेको परीक्षणको दायरा बढाउने हो, त्यो त भईरहेकै छ । अर्को भनेको लकडाउन गराउने पो हो कि भन्ने पनि छ ।’
उनका अनुसार जनस्तरबाट भने लकडाउन गराउनुपर्ने कुरा उठिरहेको छ ।
‘लकडाउन मात्रै पनि समाधानको उपाय होईन,’ उनले टाकुरासँग भने, ‘रिपोर्ट आएपछि लकडाउन गर्ने या नगर्ने भन्ने बिषयमा बैठक बसिनेछ ।’ पछिल्लो पटक गरिएका परीक्षणको रिपोर्ट अनुसार लकडाउनको बिषयमा बैठक बसिने उनको तर्क थियो ।
उनका अनुसार दैनिक परीक्षणको दायरा बढेको भएपनि रिपोर्ट आउँन ढिला भएकाले समस्या रहेको छ ।
कोरोना जोखिम वढदै गएकाले अति आवश्यक काम पर्दा मात्र घर बाहिर निस्कन अपिल गरिएको छ ।
Discussion about this post