इटहरी : स्थानीय तहको चुनावमा नेपाली कांग्रेसबाट वडाध्यक्षको टिकट नपाएपछि तत्कालीन नेकपा एमालेमा प्रवेश गरेका इटहरी ७ का हेमनारायण चौधरी पुनः नेपाली कांग्रेसमा पार्टी प्रवेश गरेका छन् ।
त्यसबेला वडा सभापति रहँदा उनले आँफूलाई वडाध्यक्षको टिकट पाउनुपर्ने माग गर्दै आएका थिए ।
तर, त्यसबेला नरबहादुर राईले टिकट पाएपछि उनी चुनावताका समयमा नै कांग्रेस पार्टी त्याग गरी एमालेमा प्रवेश गरेका थिए ।
अहिले उनलाई पुनः वडा सभापतिकै जिम्मेवारीमा मंगलबार पार्टी प्रवेश गराइएको छ । नेपाली काँग्रेस इटहरीका कार्यवाहक सभापति कोबितजंग कार्कीले पार्टीमा स्वागत गरेका हुन् ।
त्यसबेला चौधरी वडा नं. ७ का पार्टी सभापति थिए । तर, उनी पार्टी सभापति भएकै समयमा आँफूले वडाध्यक्षको टिकट नपाउँदा पार्टी परित्याग गरी एमालेमा प्रवेश गरेका थिए ।
हिजोको दिनमा पार्टीलाई सहयोग गर्ने समयमा एमालेमा प्रवेश गरेका चौधरी अहिले पुनः पार्टीमा आएर सभापतिको जिम्मेवारी लिन खोज्नु घातक रहेको अन्य नेता कार्यकर्ताको तर्क रहेको छ ।
पूर्व जिल्ला सदस्य समेत रहेका स्थानीय नेता रञ्जन रिजाल भन्छन्, ‘हिजो चुनावको समयमा पार्टीलाई धोका दिएर जानेले आज पार्टीका लागि काम गर्छन् भनेर कसरी विश्वास गर्ने ? पार्टीमा पुनः फर्काउने अभियान राम्रो भएपनि पार्टीले टिकट नदिएको झोकमा अर्को पार्टी प्रवेश गर्नेहरूले पार्टीमा काम गर्लान् भनेर विश्वास गर्ने अवस्था छैन ।’
उनले अधिवेशन नजिकिँदै गरेको अवस्थामा स्थानीय तह, सङ्घ र प्रदेशको चुनाव जित्न सहमति सहकार्य र एकताका साथ सहमतिमै अधिवेशन गर्ने अधिकांश क्रियाशील सदस्यहरूको अभिमत विरुद्ध गुटबन्दी भएको तर्क गरे ।
त्यसबेला नरबहादुर राईलाई पार्टीले वडाध्यक्षको टिकट दिएपछि चौधरी राईलाई नै हराउन लागेका थिए ।
‘चुनावताका समयमा सभापति स्वयम् एमालेमा प्रवेश गर्नु अत्यन्त घातक थियो,’ रिजालले भने, ‘त्यसबेला हामीले संघर्षले चुनाव जित्यौँ, अहिले अधिवेशन नजिकिदैँ गएपछि पार्टीमा सभापति दिनु घातक छ ।’
त्यस समयमा पार्टीको विधान अनुसार चौधरीलाई कारबाहीको प्रक्रिया अगाडि बढाईएको बताउँदै उनले भने, ‘हेमनारायण अर्को पार्टीमा गएपछि हामीले काशीराम चौधरीलाई कार्यवाहक सभापति बनाएका थियौँ, तर अहिले कसैसँग सल्लाह नै नगरी कसरी उसलाई सभापति दिन मिल्छ ?’
चौधरीलाई एकथरीका साथीहरुले पार्टीमा छलफल नै नगरी सभापति बनाइदिनु दुःखद् रहेको उनले रिजालले बताए ।
Discussion about this post