इटहरी : बैशाख ३० गते हुने स्थानीय तहको निर्वाचनमा इटहरीको मेयरमा गठबन्धनको तर्फबाट नेपाली कांग्रेसका उम्मेदवार हेमकर्ण पौडेलले यहाँ सधैँ एमालेले जितेपनि इटहरीले हारेको बताएका छन् ।
२० औँ वर्षदेखि इटहरीमा नेकपा एमालेले जितेपनि इटहरीले हारेको बताउँदै उनले यसपटक नेपाली कांग्रेसको नेतृत्वमा इटहरीले गति पाउने बताए ।
‘इटहरीमा सधैँ एमालेले जितिरह्यो, इटहरीले हारिरह्यो,’ पौडेलले भने, ‘एमाले नेतृत्वको सरकारले धेरै मुद्वा अलपत्र पारेको छ ।’
उनले नेतृत्वमा दूरदर्शिता, क्षमता नभएको आरोप लगाउँदै इटहरीमा विकासले गति नलिएको बताए ।
उनले शेरा खोलाका कारण बर्सेनी बस्तीमा बाढी पस्ने भएकाले त्यसको ठोस कदम नभएकाले अब कांग्रेसको नेतृत्वले त्यसको समाधान गर्ने तर्क राखे ।
उनले भने, ‘यसपटक कांग्रेसले नेतृत्व गर्ने अवसर पायो भने निर्वाचित भएकै वर्षदेखि काम अगाडि बढ्नेछ ।’
उनले इटहरीमा स्वास्थ्य क्षेत्र पनि पछाडि परेको बताउँदै कार्यकाल अवधिभर दुई सय बेडको अस्पताल बनाउने बताए ।
उनले भने, ‘आज एमालेको सरकार भएकै कारण सर्वसाधारण मानिस डराएर हिड्नुपर्ने बाध्यतामा छन्, अब कांग्रेसले नेतृत्व गरेपछि आम मानिसले जतिबेलै पनि उपमहानगरबाट सेवा लिन सक्छन् ।’
उनले भ्रष्टाचार नगर्ने संकल्प गर्दै जनताको आवश्यकता आफूले चिनेको बताए ।
उनले भने, ‘म निर्वाचित भएकै दिनदेखि मैले लगाएको दलको चप्पल गेट बाहिर खोलेर जनताको साझा नेता भएर काम गर्नेछु ।’
उनले कांग्रेसले जारी गरेको घोषणापत्र आम नागरिकले राखेर हरेक समयमा झक्झक्याउन पनि अपिल गरे ।
बैशाख ३० मा हुने निर्वाचनमा गठबन्धनको तर्फबाट नेपाली कांग्रेसका उम्मेदवार हेमकर्ण पौडेलले मेयरका प्रत्यासी छन् भने नेकपा एकीकृत समाजवादीका उम्मेदवार केशवकुमार विष्ट उपमेयरका प्रत्यासी छन् ।
Discussion about this post