इटहरी (डेस्क) : सुनसरी, मोरङ र झापाका भिन्नाभिन्नै दुर्घटनामा तीनजनाको मृत्यु भएको छ ।
पूर्व क्षेत्रीय ट्राफिक प्रहरी कार्यालय इटहरीका अनुसार सुनसरीको कोसी गाउँपालिका ७ आर्मिगेट अगाडि पूर्व पश्चिम लोकमार्गमा पश्चिमबाट पूर्वतर्फ आउँदै गरेको ना ३ ख ७३१५ नम्बरको कन्टेनर र पूर्वबाट पश्चिमतर्फ जाँदै गरेको को १२ प ७३३७ नम्बरको मोटरसाइकल एकापसमा ठोक्किएर भएको दुर्घटना हुँदा एकजनको मृत्यु भएको छ ।
मृत्यु हुनेमा मोटरसाइकल चालक सप्तरीका सोनुकमार झा रहेका छन् । उनको जिल्ला अस्पताल इनरुवामा उपचारका क्रममा मृत्यु भएको प्रहरीले जनाएको छ ।
यस्तै, मोरङको रंगेली ७ बसपार्कस्थित आमबारी–विराटनगर भित्रि पक्की सडक खण्डमा पूर्वबाट पश्चिमतर्फ जाँदै गरेको पिकअपको ठक्करबाट पैदलयात्री सोही ठाउँका ४५ वर्षीय तारा ढकालको मृत्यु भएको छ ।
दुर्घटनामा गम्भीर घाइते भएका उनको उपचारका क्रममा कोसी अस्पताल विराटनगरमा मृत्यु भएको प्रहरीले जनाएको छ ।
यस्तै, झापाको कमल ५ मा भएको दुर्घटनामा बेलबारी नगरपालिका ८ मोरङकी ५८ वर्षीया तुलसादेवी गुरुङको मृत्यु भएको प्रहरीले जनाएको छ ।
पूर्व पश्चिम राजमार्गमा दक्षिणबाट राजमार्गमा पश्चिमतर्फ मोड्ने क्रममा को ३२ प ८५६ नम्बरको मोटरसाइकललाई पूर्वबाट पश्चिमतर्फ जाँदै गरेको बा ५ ख ४८१३ नम्बरको बसले ठक्कर दिँदा मोटरसाइकल पछाडि सवार गुरुङको घटनास्थलमै मृत्यु प्रहरीले जनाएको छ ।
तीनवटै घटनबारे थप अनुसन्धान भइरहेको प्रहरीले जनाएको छ ।
Discussion about this post