तरहरा : इटहरी १९ तरहराका लालबहादुर विश्वकर्मालाई आर्थिक सहयोग गरिएको छ ।
शुक्रबार एक कार्यक्रमबीच इटहरी १९ भवानीपुरमा नगद रकम हस्तान्तरण गर्दै सहयोग गरिएको हो । बैंकिङ्ग ठगी कसुर मुद्दाको आरोप लागेका उनी दुई दिनअघि मात्रै अदालतबाट सफाई पाएका थिए ।
लिबरल सोसाइटीका अध्यक्ष सुबेक्छु देवानका अनुसार वकिल खर्चबापत भएको रकममा सहयोग पुगोस् भन्ने उदेश्यले आर्थिक सहयोग गरिएको हो ।
लालबहादुरले न्याय पाएपछि उक्त रकम घर चलाउन सहज होस् भन्ने उदेश्यले अहिले प्रदान गरिएको देवानले बताए ।
उनका अनुसार उक्त सहयोग हङकङ निवासी साविक हाँसपोसा बसिन्दाहरूको संस्था तरहरा–हङकङ मञ्चबाटसमेत उपलब्ध गराइएको हो ।
इटहरी २० का वडा सदस्य तनुज गुरुङ (सुरेश) ले नीतिगत गल्तीले गर्दा कानुनको भागीदार हुनुपरेपनि अब सफाई पाएपछि भने असल काम गर्न सुझाए ।
लिबरल सोसाइटीसहित तरहरा हङकङ मञ्चका सदस्य शिव रुम्दाली राईले लालबहादुरलाई एक लाख ३२ हजार ९४ रुपैयाँ हस्तान्तरण गरेका थिए ।
कार्यक्रममा लालबहादुरलाई नै प्रमुख अतिथि बनाइएको थियो । उनले आँफू एक निर्दोष रहेकाले ढिलै भएपनि न्याय पाएको बताए । उनले आँफू एक पात्र मात्रै भएपनि कारागारभित्र यस्ता निर्दोष मानिसहरू अझैपनि बन्दी हुनुपरिराखेको बताएका थिए ।
Discussion about this post