संखुवासभा : जिल्ला कारागार संखुवासभामा दुई कैदीबन्दीको मृत्यु भएको घटनामा ९ जना कैदीलाई प्रहरीले नियन्त्रणमा लिएको छ।
बुधबार दिउँसो आरोपित ९ कैदीलाई नियन्त्रणमा लिएर छुट्टै ठाउँमा राखिएको संखुवासभाका प्रमुख जिल्ला अधिकारी शिवकुमार कार्कीले जानकारी दिए।
कैदीबन्दीहरू संखुवासभा मादी नगरपालिका ५ का १९ वर्षीय विनोद तोलाङी र नुवाकोट ककनी गाउँपालिका ७ का २८ वर्षीय आकाश बलामीको मृत्यु भएको थियो । बुधबार बिहान कारागारभित्र अचेत फेला परेका उनीहरूको उपचारको क्रममा मृत्यु भएको हो ।
कारागारका जेलर राजेन्द्र घिमिरेका अनुसार आज (बुधबार) बिहान कारागारभित्र झडप हुँदा उनीहरू घाइते भएको र अस्पताल लैजाने क्रममा मृत्यु भएको हो ।
बिनोदलाई जबरजस्ती करणी मुद्दामा १८ वर्ष जेल सजाय तोकिएको थियो भने आकाश चोरी मुद्दामा तीन वर्षका लागि जेल सजाय भोगिरहेका थिए ।
बिहान करिब २ बजेतिर शौचालयको रड काटेर भाग्ने उद्देश्यले उनीहरू बाहिर निस्किएका थिए । ड्युटीमा खटिएका प्रहरीले देखेपछि उनीहरूलाई नियन्त्रणमा लिएर फेरि जेलमै राखे ।
बिहान करिब ५ बजेतिर कारागारमा हल्लाखल्ला मच्चिएको थियो । त्यसपछि जेलरसहितको टोली त्यहाँ पुगेर हेर्दा दुई जना गम्भीर घाइते अवस्थामा फेला परेका थिए ।
उक्त घटनापछि कैदीबन्दीहरूले नै आरोप लगाएका ९ जनालाई नियन्त्रणमा लिइएको कार्कीले बताए ।
जिल्ला प्रहरी कार्यालय संखुवासभाका डिएसपी वीरेन्द्र गोदारका अनुसार कैदीहरूले उनीहरूमाथि लात्ती र मुक्काले हिर्काएको प्रारम्भिक अनुसन्धानबाट खुलेको छ ।
‘घटना सेलभित्र भएको देखिन्छ। त्यहाँ सिसिटिभी राखिएको हुँदैन। अहिले नियन्त्रणमा आएका व्यक्तिहरू पनि अरूले आरोप लगाएकाले हो,’ डिएसपी गोदारले भने, ‘कारागारमा विभिन्न समूह हुने भयो। कसले गरेको हो भन्ने अनुसन्धानबाट ढिलो–चाँडो थाहा हुन्छ।’
जिल्ला प्रशासन कार्यालयले सहायक प्रमुख जिल्ला अधिकारी मोहनमणि घिमिरे नेतृत्वको छानबिन समिति बनाएको छ।
Discussion about this post