कामधेनुका कर्मचारी आत्महत्या प्रकरण : दुई फरार प्रतिवादी पक्राउ गर्न अदालतको आदेश

इटहरी : आत्महत्या दुरुत्साहन सम्बन्धी कसुरमा फरार रहेका दुई प्रतिवादीलाई पक्राउ गरी अदालतमा उपस्थित गराउन झापा जिल्ला अदालतले आदेश दिएको छ।

नेपाल सरकार वादी रहेको उक्त मुद्दामा कमल मिश्र र तेजप्रसाद सुवेदीसमेतको जाहेरीका आधारमा प्रतिवादीहरू रञ्जित कुमार झा र शेरबहादुर खड्का विरुद्ध कानुनी प्रक्रिया अघि बढाइएको हो।

अदालतका अनुसार इटहरी उपमहानगरपालिका–१ आँपगाछीमा बसोबास गर्दै आएका झापाको साविक कुमरखोद गाविस–९ निवासी ४३ वर्षीय झा र तेह्रथुमको साविक जलजले गाविस–४ निवासी हाल मोरङको सुन्दरहरैंचा नगरपालिका–४ बस्ने ३५ वर्षीय खड्का अदालतमा उपस्थित नभएपछि पक्राउ पुर्जी जारी गरिएको हो।

झा विरुद्ध ७ दिनको पक्राउ पुर्जी जारी गरिएको छ भने तोकिएको अवधिभित्र उपस्थित नभए ३५ दिनको थप पक्राउ पुर्जी तामेल गरी खोजतलास तीव्र बनाउन अदालतले निर्देशन दिएको छ। खड्काका नाममा भने ३५ दिनको पक्राउ पुर्जी जारी गरिएको अदालतले जनाएको छ।

झापा जिल्ला अदालतले इलाका प्रहरी कार्यालय दमकलाई पत्राचार गर्दै दुवै प्रतिवादीलाई खोजतलास गरी पक्राउ गरेर अदालतमा उपस्थित गराउन निर्देशन दिएको छ। अदालतले तोकिएको अवधिभित्र उपस्थित नभए थप कानुनी प्रक्रिया अघि बढाइने चेतावनीसमेत दिएको छ।

मुद्दा सम्बन्धी घटनामा इटहरी उपमहानगरपालिका–१ आँपगाछीस्थित कामधेनु दुग्ध विकास सहकारी संस्थामा कार्यरत प्रेमप्रसाद मिश्रले १७ कात्तिक २०८२ मा झापाको गौरादह नगरपालिकास्थित आफ्नै कोठामा आत्महत्या गरेको बताइएको छ।

आत्महत्याअघि लेखिएको सुसाइड नोटमा सोही संस्थाका तत्कालीन मार्केटिङ म्यानेजर रञ्जित कुमार झा र बजार प्रतिनिधि शेरबहादुर खड्काका कारण आफू आत्महत्या गर्न बाध्य भएको उल्लेख गरिएको प्रहरीले जनाएको छ।

मिश्रले संस्थाकै दुई जना कर्मचारीको नाम उल्लेख गरी आत्महत्या गरेपनि उक्त घटनालाई सामसुम पार्ने प्रयास गरिएको थियो। संस्थाका अध्यक्ष यादप ढकालले मिश्रको काममा असन्तुष्टि जनाउँदै केही स्पष्टीकरण सोधेका थिए।