इटहरी : पछिल्लो समय कोरोना महामारीको कारण देखाउँदै विभिन्न मिडिया हाउसबाट पत्रकारहरुलाई निकाल्ने, बेतलबी बिदा राख्ने तथा विभिन्न कारण देखाई तलब नै नदिई निष्कासन गर्ने कुरालाई मध्यनजर गर्दै प्रेस युनियन सुनसरीले समस्यामा परेका पत्रकारको पहिचान गरि समाधान गर्न माग गरेको छ ।
प्रेस युनियन सुनसरीका अध्यक्ष पवन अधिकारीका अनुसार पछिल्लो समय विभिन्न राष्ट्रिय तथा स्थानीय मिडियाहरुले श्रमजीवि पत्रकारहरुलाई बेतलबी बिदामा राख्ने, दबाबपूर्ण शैलीमा कामबाट निकाल्ने जस्ता कुराको अविलम्ब पहिचान गरि पत्रकारका समस्या समाधान गर्न माग गरेको हो ।
‘समस्यामा परेका पत्रकारहरुको पहिचान गरि तत्काल समस्या समाधान गर्नका लागि अपिल गरेका छौँ,’ अधिकारीले भने, ‘पत्रकार महासंघले अलग्गै कार्यदल बनाई स्थलगत रुपमा समस्या पहिचान गरि समाधान गर्न अनुरोध गरिन्छ ।’
केही दिनयता नागरिक दैनिकमा कार्यरत पत्रकार सुविद गुरागाईँले आँफूले तलव नपाएपछि अनशन समेत बस्दै आएकाले आँफूहरुको गम्भीर ध्यानाकर्षण भएको विज्ञप्तीमा उल्लेख गरिएको छ ।
प्रेस युनियन सुनसरीका अध्यक्ष अधिकारी र सचिव निशान चौधरीद्धारा जारी विज्ञप्तीमा भनिएको छ – ‘पारिश्रमिक नदिएको र पूर्व जानकारीबिनै कामबाट निकालेको कुराले हाम्रो गम्भीर ध्यानाकर्षण भएको छ । पत्रकार गुरागाईँको मागमा हाम्रो पूर्ण समर्थन रहेको छ ।’
प्रेस युनियनका केन्द्रीय पार्षद् समेत रहेका गुरागाईँ अहिले आँफूले काम गरेको तलब पाउनुपर्ने माग गर्दै काठमाडौँमा अनशनरत रहेका छन् ।
साथै संकटग्रस्त पत्रकारहरुको उद्धारका निम्ति ठोस कदम चाल्न पनि प्रेस युनियन सुनसरीको कार्यसमितिले माग गरेको छ ।
Discussion about this post