उदयपुर । डिभिजन वन कार्यालय, उदयपुरका योजना शाखा प्रमुख भुवन पौडेलविरुद्ध घुस लिएको आरोपमा अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ ।
आयोगले सोमबार भदौ २९ गते पौडेलविरुद्ध भ्रष्टाचार मुद्दा दायर गरेको हो । पौडेलले सामुदायिक वन उपभोक्ता समितिको काठको लगत समर्थन तथा काठ लिलामसम्बन्धी सहमति सिफारिसपत्र उपलब्ध गराउने क्रममा सेवाग्राहीसँग घुस मागेको र लिएको आरोप अख्तियारले लगाएको छ ।
अख्तियारका अनुसार पौडेलले सेवाग्राहीसँग १५ हजार रुपैयाँ घुस लिइसकेको अवस्थामा पक्राउ परेका थिए । उनलाई अख्तियार दुरुपयोग अनुसन्धान आयोगको टोलीले गत भदौ ४ गते डिभिजन वन कार्यालय, उदयपुरबाट घुस रकमसहित रंगेहात पक्राउ गरेको थियो ।
पक्राउपछि पौडेललाई अख्तियारको हिरासतमा राखेर घटनासम्बन्धी अनुसन्धान अघि बढाइएको थियो । अनुसन्धानबाट घुस लिएको आरोप पुष्टि भएको भन्दै आयोगले भ्रष्टाचार निवारण ऐन, २०५९ बमोजिम विशेष अदालतमा अभियोगपत्र दायर गरेको जनाएको छ ।
आयोगले पौडेलविरुद्ध १५ हजार रुपैयाँलाई बिगो कायम गरी सोहीबमोजिम जरिवाना तथा कानुनबमोजिम कैद सजायको मागदाबी गरेको छ ।
Discussion about this post