तरहरा : अहिले मुलुकमा कोरोना भाइरस संक्रमणको ग्राफ उच्च रुपमा बढ्दै गएको बेला आम मानिस आफैँ सचेत हुने बेला छ ।
तर, आफ्नो स्वास्थ्यको जोखिमका बाबजुद पनि इटहरी २० तरहरामा रहेको लिबरल सोसाइटीका युवाहरुले कोरोना संक्रमित भएको घर गाउँमा आफैँ गएर सेनिटाइज गर्दै आएका छन् ।
आइतबार तरहराका विभिन्न ठाउँका एक दर्जन बढी घरमा आफैँ पुगेर आधा दर्जन बढी युवाहरुले सेनिटाइज गरेको लिबरल सोसाइटीका उपाध्यक्ष कमल लिम्बूले बताए ।
‘हामीले यसअघि पनि विभिन्न क्षेत्रमा सेनिटाइजका कार्यक्रमहरुको आयोजना गर्दै आएका छौँ,’ उनले भने, ‘सरकारको भर नपरौँ, आफैँ सचेत बनौँ भन्ने उदेश्यले यो कार्यक्रम आयोजना गरिएको थियो ।’
संक्रमण देखिएका घर गाउँमा युवाहरु अहिले सक्रिय भएर सेनिटाइज गरिरहेका छन् । कोरोना संक्रमण देखिएको सुरुकै अवस्थादेखि नै युवाहरुले संक्रमितको घरमा गएर फलफूल, आयुर्वेदिक औषधि लगायतका सामान व्यक्तिगत खर्चमा वितरण गर्दै आएको लिबरल सोसाइटीका सदस्य सुरेस गुरुङ बताउँछन् ।
युवाहरुले आफ्नो व्यक्तिगत खर्चबाटै संक्रमितको घरमा पुगेर सेनिटाइज गर्दै आएको र सरकारको भर नपरेकाले आँफूहरु लागि परेको संस्थाकै सदस्य हिमांशु विश्वकर्माको भनाई छ ।
उनी भन्छन्, ‘हामीले विभिन्न सार्वजनिक ठाउँमा कोरोना सम्बन्धि सचेतनाका बोर्डहरु पनि राख्दै आएका छौँ, यो अभियानलाई पनि निरन्तरता दिईरहेका छौँ ।’
यसरी युवाहरुले सरकारले गर्नुपर्ने काम गरेकाले आँफूहरु हर्षित भएको स्थानीय बताउँछन् । यतिबेला युवाहरुलाई प्रोत्साहन गर्दै सकारात्मक कामका लागि अगाडि बढाउनुपर्ने स्थानीयको तर्क रहेको छ ।
Discussion about this post