संखुवासभा : संखुवासभाको मादी नगरपालिका ६ स्थित सातघुम्तीमा कहालीलाग्दो दुर्घटना भएको छ ।
बिहीबार बिहान करीब ७ः४५ बजे जिल्लाको मादीबाट झापाको दमकतर्फ आउँदै गरेको बा ४ ख ७३५ नम्बरको यात्रुबाहक बस दुर्घटना हुँदा १५ जनाको मृत्यु भएको छ ।
पूर्व क्षेत्रीय ट्राफिक प्रहरी कार्यालय इटहरीका एसपी वासुदेव खतिवडाका अनुसार १४ जनाको घटनास्थलमै मृत्यु भएको हो भने एकजनाको धरानस्थित वीपी कोइराला स्वास्थ्य विज्ञान प्रतिष्ठानमा उपचारको क्रममा मृत्यु भएको हो ।
दुर्घटनामा मृत्यु हुनेमा बस धनी तथा चालक तेह्रथुम औशीडाँडा बस्ने ३० वर्षीय विपिन निरौला छन् । उनीसहित सहचालक मादी नगरपालिका ४ का ३५ वर्षीय उमेश भट्टराईको पनि घटनास्थलमै मृत्यु भएको एसपी खतिवडाले बताए ।
उनका अनुसार संखुवासभा मादी ६ बस्ने तत्काल उमेर नखुलेकी अञ्जना कटवाल, ३८ वर्षीय ईन्द्रबहादुर अधिकारी, ५ वर्षीया दीक्षा कटुुवाल, सीता बिक छन् । यस्तै, मादी ५ बस्ने ४५ वर्षीय दीपक दाहाल, ५२ वर्षीय श्याम शेर्पा, ५५ वर्षीय भवानी दाहाल रहेका छन् ।
यस्तै, मादी ४ बस्ने ३८ वर्षीय आईतबहादुर तामाङ, ६० वर्षीय बलबहादुर कार्की, ३५ वर्षीय सबिता राउत कार्कीको घटनास्थलमै मृत्यु भएको एसपी खतिवडाले बताए ।
यस्तै, ताप्लेजुङकी ३१ वर्षीया समीक्षा योञ्जन, उनका ८ वर्षीय छोरा सुदीप घिसिङको समेत घटनास्थलमै मृत्यु भएको प्रहरीले जनाएको छ । यस्तै, उपचारको क्रममा धरानस्थित वीपी कोइराला स्वास्थ्य विज्ञान प्रतिष्ठानमा मादी ५ बस्ने ३० वर्षीया युका पोखरेलको मृत्यु भएको प्रहरीले जनाएको छ ।
उनीसहित अन्य चारजनालाई नेपाली सेनाको टोलीले हेलिकोप्टरमार्फत उद्वार गरी वीपी प्रतिष्ठानमा ल्याइएपनि पोखरेलको उपचारको क्रममा मृत्यु भएको प्रहरीले जनाएको छ ।
अन्य घाइतेहरूमा संखुवासभा मादी ५ बस्ने ३० वर्षीय सुभाष गोले, मादी ६ बस्ने २२ वर्षीया तुलसा कटुवाल, मादी ६ बस्ने उमेर नखुलेकी अम्बिका बिक, सोही ठाउँ बस्ने ५० वर्षीय डम्बरबहादुर कार्कीको वीपी प्रतिष्ठानको आकस्मिक कक्षमा उपचार भइरहेको छ ।
तीव्र गतिका कारण दुर्घटना भएको प्रहरीको प्रारम्भिक अनुसन्धानबाट खुलेको एसपी खतिवडाले बताए । ‘घुम्ती बाटो र तीव्र गतिका कारण दुर्घटना भएको प्रारम्भिक अनुसन्धान गरेका छौँ,’ एसपी खतिवडाले टाकुरासँग भने, ‘गाडीको कन्डिसन पनि त्यस्तै भएको र मेकानिकल प्रबलम भएको भन्नेबारे अनुसन्धानकै क्रममा छौँ ।’
उनका अनुसार बसमा यकिन कतिजना थिए भन्नेबारे अहिलेसम्म यकिन हुन सकेको छैन । उनले भने, ‘अहिलेसम्म हेर्दा १९ जना सवार जस्तो देखियो, तर ठ्याक्कै कतिजना थिए भन्नेबारे भेरिफाई हुन सकेको छैन, खोजतलास पनि भइरहेको छ ।’
उनका अनुसार बसमा सवार अन्य रहेको अनुमान गरिएपनि खोजतलास गरिएको छ भने घटनाबारे सुक्ष्म अनुसन्धान सुरु गरिएको छ । तत्कालको परिस्थितिमा तीव्र गति र घुम्ती बाटोकै कारण दुर्घटना भएको अनुमान गरिएपनि आफूहरू अनुसन्धानकै क्रममा रहेको उनले जानकारी दिए ।
यता, प्रमुख जिल्ला अधिकारी नूरहरि खतिवडाका अनुसार मृतकहरूको शव चैनपुर अस्पतालमा राखिएको छ । मादीमा भएको बस दुर्घटना अत्यन्त हृदयविदारक रहेको उनले बताए ।
उनका अुनसार बस सडकबाट करीब तीन सय मिटर तल खसेको थियो । दुर्घटनामा मादी गाउँ शोकमा डुबेको उनले बताए ।
यो पनि – अपडेट : तीव्र गतिका कारण भीरबाट बस खस्दा १४ को मृत्यु, पाँचको अवस्था गम्भीर (नामावलीसहित)
यो पनि – संखुवासभा बस दुर्घटना अपडेट : भीरबाट तीन सय मिटर तल खस्दा मृतकको संख्या १३ पुग्यो
यो पनि – Breaking : संखुवासभाबाट इटहरी आउँदै गरेको बस भीरबाट खस्यो
Discussion about this post