इटहरी : इटहरीको मुख्य चौक आसपास तेस्रो लिङ्गीहरूको यौनजन्य गतिविधि रोक्न इटहरीका मेयर हेमकर्ण पौडेलसहित सर्वसाधारण रातको समयमा सडकमा निस्किएका छन् ।
सामाजिक विकृति रोक्न मेयर पौडेलसहित सर्वसाधारणले मंगलबार राति सडकमा निस्किएका हुन् ।
रातको समयमा तेस्रो लिङ्गीहरुले इटहरीको पश्चिम लाइनमा अश्लीलता देखाएको भन्दै इटहरीका मेयर पौडेल प्रहरी प्रशासन लिएर आफैँ सडकमा पुगेका थिए ।
पछिल्लो समय पोखरा, काठमाडौं लगायतका सहरहरूबाट तेस्रो लिङ्गीहरू इटहरी आउने र यौनधन्दा गरेर अपराध बढेकाले सभ्य समाज निर्माण गराउन लागि पर्ने मेयर पौडेलको भनाइ छ ।
रातको समयमा सडकमा सवारीसाधनमा आवतजावत गर्नेहरूमाथि तेस्रो लिङ्गीले दुःख दिएको गुनासा आएपछि आफूहरू सचेत भएको उनले बताए ।
तेस्रो लिङ्गीहरूले रातको समयमा अश्लीलता प्रकट गरेर सताएका थुप्रै मौखिक गुनासा आइरहेका बेला केहीलाई पक्राउ गरेर एक रात राखिएको इलाका प्रहरी कार्यालय इटहरीका डीएसपी खगेन्द्रबहादुर खड्काले बताए ।
‘रातको समयमा अवैध धन्दासँगै आपराधिक घटना बढेकाले पनि प्रहरी सचेत छ,’ खड्काले भने ।
इटहरी ९ का वडाध्यक्ष जीतेन्द्र थापाले सहरमा विकृति फैल्याएको भन्दै तेस्रो लिङ्गीहरूलाई अनैतिक काम नगर्न चेतावनी दिएको बताए ।
नागरिक समाज इटहरीका अध्यक्ष राजु केसीले इटहरीमा बाहिरबाट तेस्रो लिङ्गीहरू आएर यौनजन्य गतिविधि गरेकाले त्यसतर्फ सचेन हुनुपर्ने बताएका थिए ।
मेयर हेमकर्ण पौडेलका स्वकीय सचिव विक्रम घिमिरेले भने ‘मुख्य चोकमै हुने नकारात्मक गतिविधिबारे नगर प्रमुखले कडा कदम चाल्नुहुनेछ, सोही अभियान अन्तर्गत आज पहिलो दिन हो ।’
सडक आसपासमा बस्दै आएकाहरूलाई उद्दार गर्ने अभियान निरन्तर चल्ने र उनीहरूमाथि निगरानी बढाइने उनले बताए ।
यसैबीच सोमबार राति इटहरी आसपासका सडक आश्रित १३ जनाको उद्वार गरिएको थियो । मानसिक सन्तुलन गुमाएका तथा आफन्त नभएकाहरूलाई उद्वार गर्न इटहरी उपमहानगरले अभियान चलाएको बताइएको छ ।
मेयरले दिए अलपत्र परेकालाई घरसम्म पुग्ने खर्च
मध्यरातमा खर्चको कारण इटहरी आसपासमा अलपत्र परेकाहरूलाई इटहरीका मेयर हेमकर्ण पौडेलले घर पुग्ने सम्मको व्यवस्था गरिदिएका छन् ।
मंगलबार राति आर्थिक अभावको कारण इटहरीको सडक पेटीमा भेटिएका सविन धिमाललाई एक रात इटहरीमा खान बस्नसहित घर पुग्ने व्यक्तिगत खर्च मेयर पौडेलले दिएका हुन् ।
आफू आर्थिक अवस्थाको कारण समस्यामा परेको बेला आफूलाई खर्च दिएको भन्दै धिमालले मेयर पौडेलको प्रशंसा समेत गरे ।
Discussion about this post