इटहरी : सेवाग्राहीलाई अनावश्यक दुःख, हैरानी र आर्थिक चलखेल गर्दै आएका बिचौलियाविरुद्ध सुनसरी प्रहरीले कारबाही थालेको छ ।
प्राप्त सूचनाका आधारमा जिल्ला प्रहरी कार्यालय सुनसरीले मालपोत कार्यालय इनरुवा तथा यातायात व्यवस्था कार्यालय इटहरी परिसरमा सक्रिय बिचौलियाहरूलाई नियन्त्रणमा लिएको हो ।
प्रहरीका अनुसार मिति बुधवार इनरुवा नगरपालिका–३ स्थित मालपोत कार्यालय परिसरबाट १३ जना बिचौलियालाई नियन्त्रणमा लिइएको छ ।
जिल्ला प्रहरी कार्यालय सुनसरीका प्रवक्ता, डीएसपी चन्द्रबहादुर खड्काका अनुसार सेवाग्राहीको काम छिटोछरितो गरिदिने बहानामा अवैध रूपमा रकम असुल्दै आएको गुनासोपछि प्रहरी निरीक्षक प्रकाश पराजुलीको कमाण्डमा खटिएको टोलीले उनीहरूलाई नियन्त्रणमा लिएको हो ।
पक्राउ पर्नेहरूमा रामधुनी–९ का २८ वर्षीय युजिन घिमिरे, रामधुनी–५ का ५६ वर्षीय धननारायण श्रेष्ठ, इटहरी–५ की २७ वर्षीया अर्चना आचार्य, इटहरी–५ का ५० वर्षीय दीपककुमार दाहाल, इनरुवा–३ की ३२ वर्षीया आयसा मोते, इनरुवा–२ का २४ वर्षीय मिलन मेहता रहेका छन् । यसैगरी इनरुवा–६ का ५२ वर्षीय मेघराज फुयाल, इनरुवा–८ का ४० वर्षीय वीरेन्द्र पण्डित, इनरुवा–२ का ३५ वर्षीय असिप आचार्य, इनरुवा–६ का ४९ वर्षीय रोशन विक, इनरुवा–१ का ३२ वर्षीय प्रमोसकुमार सिंह, भोक्राहा नरसिंह गाउँपालिका–५ का २५ वर्षीय एकरार आलम मन्सुरी र भोक्राहा नरसिंह–१ का २६ वर्षीय सर्ताज आलम मन्सुरी रहेका छन् ।
पक्राउ परेकाहरूलाई जिल्ला प्रहरी कार्यालय सुनसरीमा राखी थप अनुसन्धान भइरहेको जनाइएको छ।
यसैगरी, इटहरी उपमहानगरपालिका–१० स्थित यातायात व्यवस्था कार्यालय परिसरबाट थप चार जना बिचौलियालाई नियन्त्रणमा लिइएको इलाका प्रहरी कार्यालय इटहरीका डीएसपी सुवास हमालले जानकारी दिए । उनका अनुसार सेवाग्राहीसँग अवैध रूपमा रकम माग्ने र सेवा प्रक्रियामा अवरोध गर्ने गतिविधिमा संलग्न रहेको आरोपमा उनीहरूलाई नियन्त्रणमा लिइएको हो ।
प्रहरी निरीक्षक दुर्गा खनालको नेतृत्वमा खटिएको टोलीले यातायात कार्यालय परिसरबाट इटहरी–४ का २७ वर्षीय सुमन ओझा, इटहरी–१० का ४६ वर्षीय शेरबहादुर कार्की, इटहरी–४ का ५० वर्षीय योगेन्द्र ओझा र इटहरी–४ का ४० वर्षीय सूर्य थापालाई नियन्त्रणमा लिएको हो । पक्राउ परेकाहरूलाई हाल इलाका प्रहरी कार्यालय इटहरीमा राखेर अनुसन्धान भइरहेको डीएसपी हमालले जानकारी दिए ।
प्रहरीले पछिल्लो समय सरकारी कार्यालय परिसरमा बिचौलियाको सक्रियता बढ्दै गएको भन्दै यसलाई नियन्त्रण गर्न विशेष अभियान सञ्चालन गरिएको जनाएको छ ।
यो पनि – सुनसरीमा बिचौलियाको बिगबिगी, यातायात र मालपोत कार्यालयबाट दर्जन बढी नियन्त्रणमा
Discussion about this post