इटहरी (डेस्क) : मोरङको लेटाङ नगरपालिका ५ मा आक्रमणबाट मारिएकी प्रहरी जवान उर्मिला श्रेष्ठलाई शोक सलामी दिइएको छ ।
कोसी अस्पताल विराटनगरको प्राङ्गणमा प्रदेश १ प्रहरी प्रमुख डिआइजी अरुणकुमार बिसीको उपस्थितिमा शोक सलामी अर्पण गरिएको हो ।
आक्रमणबाट मारिएकी उर्मिलाको शरीरमा डिआइजी बिसीले नेपाल प्रहरीको झन्डा ओढाएर पुष्पगुच्छासहित श्रद्धाञ्जली अर्पण गरे ।
मोरङका प्रमुख जिल्ला अधिकारी काशीराज दाहाल, मोरङ प्रहरीका प्रमुख एसपी जनार्दन जिसी, मोरङ ट्राफिक प्रमुख चन्द्रबहादुर खड्का लगायत प्रहरी कर्मचारीले पुष्पगुच्छासहित श्रद्धाञ्जली अर्पण गरेका हुन् ।
तीन वर्षयता प्रहरी सेवामा कार्यरत प्रहरी जवान उर्मिला श्रेष्ठ आइतबार आक्रमणबाट मारिएकी हुन् ।
प्रहरीका अनुसार उदयपुरको त्रियुगा निवासी उर्मिलाको परिवारले शव लिएर गएको छ। उनको अन्त्यष्टि उदयपुरमै गर्ने तयारी छ।
उर्मिला २०७६ साउन १ गते प्रहरी सेवामा प्रवेश गरकी थिइन् । १ नम्बर प्रदेश सशस्त्र प्रहरी गण मुख्यालय रानी विराटनगरमा दरबन्दी भएकी उर्मिलासहितको टोली आइतबार दिउँसो लेटाङ पुगेको थियो ।
शुक्रबार होलीको दिन लेटाङ नगरपालिका ५ को शिक्षा विकास माविका शिक्षक मनोज पौडेलले सोही विद्यालयकी एक छात्रालाई घरमै पुगेर यौन दुर्व्यवहार गरेको विषयमा तनाव हुँदा प्रदर्शनकारीको आक्रमणबाट श्रेष्ठको मृत्यु भएको थियो ।
उनको घाँटीमा धारिलो हतियारबाट आक्रमण भएको थियो । प्रहरीमाथि आक्रमण गर्ने ८ जनालाई जिल्ला प्रहरी कार्यालय मोरङले नियन्त्रणमा लिइ अनुसन्धान शुरु गरेको छ ।
यो पनि – लेटाङ घटना अपडेट : पाँच जना पक्राउ
Discussion about this post