बकैया साहित्य महोत्सवको तयारी, धरानका भीम खतिवडा सम्मानित हुँदै

झरना साहित्यिक परिवारले बकैया साहित्यिक महोत्सवको तयारी गरेको छ ।

२०५० सालमा मकवानपुरको साविक छतिवन गाविस, हाल बकैया गाउँपालिकामा स्थापना भएको उक्त साहित्यिक परिवारले साहित्यिक महोत्सवको आयोजनाको तयारी गरेको हो ।

स्थापना कालदेखि नै साहित्यिक कार्यक्रमहरू गर्ने र विद्यालय तहमा अध्ययनरत विद्यार्थीहरूलाई साहित्यमा लाग्न प्रेरित गर्ने अभियानहरू सञ्चालन गर्दै उक्त संस्थाले आगामी फागुन १४ र १५ गते साहित्यिक महोत्सव आयोजना गर्न लागेको हो ।

पहिलो दिन फागुन १४ गते नवसर्जक बालबालिका विशेष रचना वाचन, पुरस्कार वितरण एवम् बहसमुलक कार्यक्रम आयोजना गर्ने तयारी रहेको छ । त्यस्तै, दोस्रो दिन फागुन १५ गते शनिबार स्रष्टा सम्मान, स्थानीय सांस्कृतिक नृत्य कार्यक्रमको आयोजना हुनेछ ।

नुरप्रसाद गौतमले स्थापना गरेको होमनाथ–टीकामाया प्रतिभा सम्मानबाट नगद १५ हजार पाँच सय ५५ सहित अग्रज साहित्यकार, टाकुरान्यूजका सल्लाहकार, सुनसरी धरानका प्राडा भीम खतिवडा सम्मानित हुनेछन् ।

त्यस्तै, विनोद सुवेदीले स्थापना गरेको बाबुलाल–भोजमाया प्रतिभा सम्मानबाट नगद ११ हजार एक सय ११ सहित अग्रज कवि आरआर चौलागाई सम्मानित हुनेछन् । त्यस्तै, रमेशमोहन अधिकारीले स्थापना गरेको शिव–सावित्री अधिकारी स्मृति मुक्तक सम्मान बाट नगद ११ हजार एक सय ११ सहित अग्रज मुक्तककार ज्ञानुवाकर पौडेल सम्मानित हुनेछन् ।

त्यस्तै, अर्पणरदर्पण पराजुलीले स्थापना गरेको खडानन्द–मनमाया स्मृति प्रतिभा सम्मानबाट नगद ५ हजार पाँच सय ५५ सहित युवा साहित्यकार सुमित्रा सुमी सम्मानित हुनेछन् ।

त्यस्तै, राजन दङ्गालले स्थापना गरेको सुशीला दङ्गाल स्मृति सिर्जनशील नारी सम्मानबाट नगद ५ हजार पाँच सय ५५ सहित साहित्यकार रुकु कार्की सम्मानित हुने आयोजकले जनाएको छ । त्यस्तै, तुलसी गिरीले स्थापना गरेको सञ्जीवनी बुटी साहित्य सेवा सम्मानबाट नगद ५ हजार पाँच सय ५५ सहित मनहरी लामिछाने सम्मानित हुनेछन् ।

त्यस्तै बकैया गाउँपालिकाले स्थापना गरेको झरना–बकैया पत्रकारिता पुरस्कारबाट नगद ५ हजार पाँच सय ५५ सहित खेम बोलखे सम्मानित हुनेछन् भने चन्द्रकुमार राईले स्थापना गरेको झरना–बकैया नवप्रतिभा पुरस्कारबाट नगद दुई हजार ५ सय ५ सहित दीपशिखा घिमिरे सम्मानित हुने कार्यक्रम रहेको आयोजकले जनाएको छ ।