इटहरी : सहिद रत्नकुमार बान्तवाको जीवनमा आधारित रहेर तयार पारिएको पुस्तक ‘नेपालमा सुरुङयुद्ध’को शनिबार विमोचन गरिएको छ ।
इटहरीस्थित सङ्गीत साधना प्रतिष्ठानले आयोजना गरेको कार्यक्रम प्रतिष्ठानकै सभाहलमा पुस्तकको विमोचन गरिएको हो ।
लेखकद्धय अर्जुनकुमार उप्रेती र जसकुमार राईले पुस्तक लेखेका हुन् । लेखकद्धयसहित कोशी प्रदेशका मुख्यमन्त्री हिक्मतकुमार कार्कीले पुस्तकको विमोचन गरेका हुन् ।
कार्यक्रममा बोल्दै मुख्यमन्त्री कार्कीले आफू पनि उनै रत्नकुमारको प्रेरणाबाट राजनीतिमा आएको सुनाए । ‘अलिकता जीवनी, अलिकता उहाँका वैचारिक धारबारे यो पुस्तक लेखिनु आफैँमा राम्रो कुरा हो,’ मुख्यमन्त्री कार्कीले भने, ‘म उहाँको (रत्नकुमार) मृत्युपछि पार्टीमा संगठित भएको कार्यकर्ता हुँ ।’
रत्नकुमारकै आदर्श र उनैले अगाडि सारेको ‘सुखी नेपाली, समृद्ध नेपाल’ बनाउने अभियानमा आफू जोडिइराख्ने मुख्यमन्त्री कार्कीले बताए । ‘म रत्नकुमार बान्तवाकै घरमा पुगेको छु, अहिले पनि त्यो सुरुङ छ,’ उनले भने, ‘त्यो सुरुङ वर्ग सत्रुबाट बच्न बनाएकोजस्तो देखिन्छ । जसलाई हामीले संरक्षण गरेर राखेका छौँ ।’
यो पुस्तकले सुरुङयुद्ध सुरु गरेको हो भन्ने सन्देश दिन सक्ने उनको भनाइ छ । ‘आन्दोलनमा दुई चार सय मान्छे मारिए भन्दापनि कहाँबाट प्रारम्भ भयो, कसले सुरु ग¥यो भन्ने महत्वपूर्ण हुन्छ,’ कार्कीले भने, ‘वर्ग सत्रुलाई परास्त गर्न सकिन्छ भन्ने कन्सेप्ट ल्याउनु नै ठूलो कुरा हो । यो पुस्तकले रत्नकुमारका विभिन्न पक्षलाई उजागर गर्ने प्रयास गरेको छ ।’
कार्यक्रममा टिप्पणीकर्ताद्धय डा. दिवाकर रेग्मी र डा. अस्मिता विष्टले पुस्तकमाथि विचार राखेका थिए ।
डा. रेग्मीले इतिहास शासकको चस्माबाट मात्रै नियालिएको बताए । ‘हामीले शासक र लेखकको चस्माबाट मात्रै इतिहास पढ्यौँ । तर, रत्नकुमार बान्तवाले सहादत प्राप्त गर्दा त्यसबेलाका साक्षीसहितको भनाइ उनीहरूकै भाषामा उठान गरिएको छ । यसैले पनि यो सशक्त पुस्तक हो,’ उनले भने ।
पुस्तकमाथि टिप्पणी गर्दै डा. विष्टले रत्नकुमार वान्तवाले आफ्नो सम्पत्तिसमेत बेचेर सुरुङ युद्ध प्रारम्भ गरेकाले त्यसबाट राजनीतिक क्रान्ति सुरु भएर गणतन्त्र उन्मुख गराएको बताइन् ।
पुस्तकमा इलामको चित्रेबाट सुरु भएको सुरुङयुद्धको बयान गरिएको छ । सुरुङयुद्धकै क्रममा रत्नकुमार मारिए । उनले छोटो समयमै देश र जनताका लागि बलिदान दिएका थिए । नेपालको वर्गीय मुक्ति आन्दोलनमा पञ्चायती तानाशाह र सामन्तविरुद्ध सुरुङयुद्धको धावा बोल्ने पहिलो व्यक्ति हुन्, रत्नकुमार ।
उनै रत्नकुमारको जीवनमा आधारित रहेर तयार गरिएको पुस्तक ‘नेपालमा सुरुङयुद्ध’ लेखिएको हो । जहाँ सहिद रत्नकुमार बान्तवाको संघर्ष र बलिदानको नालीबेली प्रस्तुत गरिएको छ । पुस्तकमा झलनाथ खनाल, ईश्वर पोखरेल, प्रदीप नेपाल, बम देवानलगायत थुपै्र नेताहरूले रत्नकुमारको योगदानबारे चर्चा गरेको प्रसङ्ग उठान गरिएको छ ।
२००८ साल चैत २७ गते इलामको चमैताको चित्रे (हाल देउमाई नगरपालिका–१) मा जन्मिएका रत्नकुमारलाई २०३५ साल चैत २७ गते तत्कालीन पञ्चायत सरकारले इभाङको जंगलमा गोली हानी हत्या गरेको पुस्तकमा उल्लेख छ ।
भिडियो
Discussion about this post