मोरङ : मोरङका पाँच क्रसर उद्योगमाथि राजस्व हिनामिना र कानुनी अनियमितताको अनुसन्धान सुरु भएपछि पूर्व–पश्चिम राजमार्ग विस्तारअन्तर्गत काँकडभिट्टा–लौकही सडकखण्डको निर्माण कार्य प्रभावित भएको छ।
जिल्ला अनुगमन समितिको छापापछि उद्योगका कागजात जफत गरिएका छन् भने आन्तरिक राजस्व कार्यालय विराटनगर र दमकले कारोबार, भ्याट विवरण तथा राजस्व चुहावटबारे अनुसन्धान अघि बढाएका छन्।
अनुसन्धानकै क्रममा उद्योगहरू बन्द हुँदा सडक निर्माणका लागि आवश्यक गिट्टी र अस्फाल्ट उत्पादन रोकिएको छ।
लेटाङ र मिक्लाजुङका चार उद्योग तथा बेलबारीको एक उद्योगमाथि दर्ता, नवीकरण, वातावरणीय स्वीकृति र करसम्बन्धी अनियमितताको आरोप लागेको छ।
प्रशासनका अनुसार लेटाङमा रहेको ओम श्री क्रसर उद्योग एण्ड सप्लायर्स, माँ भगवती स्टोन मिल्स, बेलबारीको कान्तिपुर वासिङ उद्योग, बेलबारी र मिक्लाजुङमा रहेको देवीथान कङ्क्रिट उद्योगसँगै श्री सिआरएफजी–टुन्डी जेभीले आयोजनाबाहिर सामग्री बिक्री गरेको आशङ्कामा अनुसन्धान भइरहेको छ ।
केही उद्योग दर्ताबिनै सञ्चालन भएको, केहीले अनुमतिभन्दा फरक प्रकृतिको काम गरेको तथा एउटा उद्योग कम्पनी रजिस्ट्रार कार्यालयमै दर्ता नभएको पाइएको छ।
क्रसर बन्द भएपछि एसियाली विकास बैंकको सहयोगमा निर्माणाधीन ९५.७६ किलोमिटर सडक आयोजनाको प्रगति प्रत्यक्ष प्रभावित भएको छ। आयोजनाअन्तर्गत करिब २५ किलोमिटर सडक कालोपत्रेका लागि तयारी अवस्थामा रहे पनि निर्माण सामग्री अभावले काम रोकिएको छ।
निर्माण कम्पनी कालिका कन्स्ट्रक्सनका अनुसार ३० करोड रुपैयाँ बराबरको बिटुमिन मौज्दात हुँदाहुँदै गिट्टी नपाउँदा दैनिक ८ सय घनमिटर अस्फाल्ट उत्पादन रोकिएको छ। यसले दैनिक पाँच सय मिटर सडक कालोपत्रे गर्ने लक्ष्यसमेत प्रभावित बनेको छ।
प्रमुख जिल्ला अधिकारी युवराज कट्टेलले कानुनी प्रक्रिया पूरा नगरेका उद्योगलाई सञ्चालन अनुमति नदिने स्पष्ट पारेका छन्।
उता निर्माण व्यवसायीहरूले भने राष्ट्रिय गौरवको आयोजनालाई जोगाउन वैकल्पिक व्यवस्था खोज्न सरकारसँग माग गरेका छन्।
Discussion about this post