इटहरी : इटहरीस्थित सङ्गीत साधना प्रतिष्ठानको सभाहलमा आइतबार आयोजित साहित्यिक कार्यक्रममा विभिन्न विद्यालयका विद्यार्थीहरूले आफ्ना सिर्जनात्मक कविता वाचन गरेका छन् ।
साहित्य सङ्गीत उत्सव–२०८३ अन्तर्गत आयोजित कार्यक्रममा इटहरीका विभिन्न शिक्षालयमा कक्षा ८ देखि १२ सम्म अध्ययनरत १८ जना विद्यार्थीले कविता प्रस्तुत गरेका हुन् ।
कार्यक्रममा कञ्चन रिमाल, हिमानिशा पराजुली, समृद्धि घिमिरे, अञ्जली रौनियार, युविसा श्रेष्ठ, मनिता रम्तेल, दिलाशा न्यौपाने, आरती फुयाल, ओजश्वी कटवाल, सिर्जन खत्री, नफिशा खातुन, प्रियंका बोहरा, आविष्कार घिमिरे, इमाशा कटवाल, श्रेया भट्टराई, उत्सव भट्टराई, रिवास राई र श्रेयसी भट्टराईले कविता सुनाएका थिए ।
प्रमुख अतिथि प्रसिद्ध कवि मनु मञ्जिलले कविता सिर्जना गर्ने व्यक्तिमा करुणाभाव अनिवार्य हुनुपर्ने धारणा राखे ।
उनले कविता, सङ्गीत र चित्रकलामा संलग्न स्रष्टाले समाजलाई फरक दृष्टिकोणबाट हेरेर गहिरा अनुभूतिलाई कलामार्फत अभिव्यक्त गर्न सक्नुपर्ने बताए ।
मञ्जिलले कविताको सार ठूल्ठूला विषयभन्दा पनि जीवनका मसिना तर गहन अनुभूतिलाई प्रभावकारी ढङ्गले शब्दमा उतार्न सक्नुमा रहेको उल्लेख गरे ।
उनले भने, ‘कविता लेख्ने, संगीतमा काम गर्ने र पेन्टिङ गर्ने मानिसमा करुणाभाव हुनुपर्छ । आम मानिसले हेर्नेभन्दा फरक कोणबाट हेरिनुपर्छ, लेखिनुपर्छ ।’
खासगरी मञ्जिलले आफूले कवि हुनका लागि निरन्तर अभ्यास गरेको स्मरण गर्दै जो मानिसले निरन्तर अभ्यास गर्छ त्यही व्यक्तिले शक्तिशाली कविता लेख्न सक्ने बताए ।
उनले थपे, ‘आज जति पनि गीत लेखिएका छन्, जति पनि कथा लेखिएका छन्, जति पनि मोटा–मोटा किताब लेखिएका छन्, ती लेख्ने मानिसहरू कवि हुन् । काव्य बिनाको लेखनको कुनै अर्थ हुँदैन ।’
कार्यक्रममा कवि बद्री भिखारी, देवान किराती र प्रज्वल पराजुली, शिक्षासेवी गणेश दुलाललगायतले विद्यार्थीहरूको कविता श्रवण गर्दै उनीहरूलाई साहित्य सिर्जनामा निरन्तर लाग्न प्रेरित गरेका थिए ।
सङ्गीत साधना प्रतिष्ठान नेपालका अध्यक्ष प्रदीप रेग्मीको अध्यक्षतामा सम्पन्न कार्यक्रमबारे महासचिव राजु केसीले प्रकाश पारेका थिए ।
आयोजकका अनुसार यस्ता कार्यक्रमले विद्यालय तहका विद्यार्थीमा साहित्यप्रतिको रुचि, सिर्जनशीलता र अभिव्यक्ति क्षमता विकास गर्न महत्वपूर्ण योगदान पुग्ने विश्वास गरिएको छ ।
Discussion about this post