यसपालिको दशैँ लगत्तै मनास्लु सर्किटको पदयात्रा गर्ने अवसर मिल्यो ।
महांल.गुर हिमालय रेन्ज भन्दा निक्कै पश्चिम अनि अन्नपूर्ण हिमाल भन्दा ६४ कि.मि. पूर्वमा पर्ने मनश्री हिमालय रेन्जमा अवस्थित मनास्लुको समीपमा पुग्दा सोचे भन्दा र अरू मानिसले भने भन्दा फरक र सुन्दर रहेछ मनास्लु हिमाल ।
जापानिज हिमाल, किलर माउण्टेन आदि नामले चिनिने मनास्लुलाई धार्मिक हिमाल पनि भनिदो रहेछ ।
संस्कृत भाषाको ‘मनासा’ बाट मनास्लु भएको भन्ने किंवदन्ती रहेछ । जहाँ मनासाको अर्थ आत्मा भन्ने हुँदोरहेछ ।
सगरमाथाको सफल आरोहणको ३ वर्षपछि जापनिज एक्स्पिडिसन टिमको नेतृत्वमा ‘तोसी इमानिषी’ नामका जापनिजले पहिलोपटक मनास्लु हिमालको सफल आरोहण गरेर विश्व कीर्तिमान बनाएको इतिहास छ ।
जहाँ उनलाई नेपाली शेर्पा ग्याल्जेन नोर्बुले साथ दिएका थिए । जापानिज नागरिक यूको माकीले नेतृत्व गरेको आरोहण दलमा तोसी इमानिषी र ग्याल्जेन नोर्बु शेर्पाले सफल आरोहण गरि बिश्व कीर्तिमानी इतिहासमा पहिलो आरोहीको रूपमा नाम लेखाएका रहेछन् ।
संसारका ८ हजार मिटर माथिका १४ वटा हिमालमध्ये ८ वटा नेपालमै छन् । त्यसमध्येमा आठौँ स्थानमा रहेको मनास्लुको उचाई समुन्द्र सतहदेखि ८ हजार १ सय ६३ मिटर अर्थात् २६ हजार ७ सय ८१ फिट रहेको छ ।
मे ९, सन् १९५६ मा मनास्लु शिखरमा पहिलोपटक सफल आरोहणको झण्डा फहराइएको थियो ।
हिमाल आरोहीहरूले यसलाई किलर माउण्टेन्ट पनि भन्ने गर्दा रहेछन् । चारैतर्फ चुच्चु र धारिलो धार भएको आरोहण गर्न अति कठिन हिमालको सूचीमा पर्ने मनास्लुमा हिउँ पहिरोको जोखिम अत्यन्तै धेरै हुनेरहेछ ।
जसकारण धेरै आरोहीहरू आरोहण गर्दा गर्दै हिउँपहिरोमा परेर ज्यान गुमाउन पुग्दारहेछन्, मनास्लुमा । तर, अहिले चाँहि मनास्लुभन्दा अझै धेरै हिउँपहिरो जाने र धेरै दुर्घटना हुने भएकोले अन्नपूर्ण–१, लाई किलर माउण्टेन्ट भनिन थालेको रहेछ ।
गोरखा जिल्लाको उत्तरी भेगमा पर्ने मनास्लु हिमाल, गोरखाको सबैभन्दा उत्तरतर्फको गाउँ साम्दो र आधार शिविर भन्दा सिधै तलको स्थान सामागाउँ जस्ता सुन्दर हिमाली बस्तीले आम्ने साम्ने सम्वाद गर्ने जस्तो लाग्ने चुम उपत्यकामा अवस्थित छ ।
तिब्बतीयन बुद्धिष्ट संस्कृतिको बाहुल्यता रहेको चुमभेली क्षेत्रमा पर्ने मनास्लु हिमाल मनास्लु पदमार्ग पछ्याउँदै जादा बाटैमा पर्दछ । समुन्द्र सतहबाट ३ हजार ५ सय मिटर उचाईको सामागाउँबाट ४ हजार ८ सय मिटरको आधारशिवर पुग्न ठाडै उकालो चढेर जानुपर्ने रहेछ ।
एकै दिनमा सामागाउँबाट आधार शिविर पुगेर दिनभरि हिउँ खेलेर बेलुका बास बस्न सामागाउँ नै फर्किन सकिने गाउँबाट छोटो दुरीको आधार शिविर पनि हो ।
यही सामागाउँबाट साम्दो, धर्मशाला हुँदै ५ हजार १ सय ६ मिटर उचाईको लार्केपास समेत गर्न सकिने एककाम दो पन्थ को यात्रा मनास्लु पदयात्रा ।
आफैँले आधार शिवरमा पुगेर हिमाल छाम्न, चुम्न सकिने एक अदभूत अनन्दको हिमाल पनि हो, मनास्लु ।
Discussion about this post