इटहरी : नेपाल पत्रकार महासंघ सुनसरीमा जनकऋषि राई विजयी भएका छन् । प्रेस युनियन, प्रेस संगठन र प्रेस चौतारीबीच भएको गठबन्धनका साझा उम्मेद्वार राई अध्यक्षमा विजयी भएका हुन् ।
विजयी राईले १२३ मत पाउँदा वर्तमान कार्यसमितिका उपाध्यक्ष समेत रहेका काफ्लेले ६५ मत मात्र पाए । त्यस्तै, प्रेस युनियनका बागी उम्मेद्वार सचिन पोखरेलले ४५ मत प्राप्त गरे भने सुविद गुरागाईँले १० मत प्राप्त गरे ।
उपाध्यक्षमा युनियन गठबन्धनका गणेश निरौलाले १४२ मत पाउँदा सुमन पुरीले ९८ मत प्राप्त गरे । महिला उपाध्यक्षमा उषाकिरण भट्टराईले १०० प्राप्त गरिन् । उनको निकटतम प्रतिद्वन्द्वी मनिता चाम्लिङले ५३ मत प्राप्त गरिन् । महिला उपाध्यक्ष पदका लागि ४ जनाको उम्मेद्वारी थियो । अन्य २ जना सन्जु राई र रञ्जना पौडेलले क्रमशः ४५ र ४३ मत पाए ।
सुनसरी महासंघमा सचिव पदमा तीन जनाको उम्मेद्वारी परेकोमा ध्रुब ढकाल विजयी भएका छन् । ढकालले १४८ मत पाउँदा दिनेश गजमेरले ६४ मत मात्र पाए । सचिव पदमै बागी उम्मेद्वारी दिएका भरतराज शर्मा (गोपाल) ले ३१ मत प्राप्त गरे ।
यता सह–सचिवमा तीर्थ काकी र विकल रेग्मीले बराबर मत पाए । उनीहरु दुवैले समान ११५ मत पाएका छन् । सहसचिव समावेशीमा भोला श्रेष्ठले १४२ मत ल्याउँदै विजयी भए भने उनका प्रतिद्वन्द्वी प्रदीप चौधरीले ८९ मत प्राप्त गरे । कोषाध्यक्षमा अजित झा १३१ मत ल्याउँदै विजयी भए । उनका प्रतिद्वन्द्वी कृष्ण बहाब भट्टराईले ६४ मत प्राप्त गरेका थिए । कोषाध्यक्षमा बागी उमेद्वार रहेका निशान चौधरीले ४४ मत प्राप्त गरेका थिए ।
महासंघको सदस्यहरुमा पनि साझा प्यानल नै वियजी भएको छ । सदस्यहरुमा सुस्मिता राई, विवेक रेग्मी, आरबी कटवाल, संगम विष्ट, शान्ता निरौला, सुक्रान्त राई, निश्चल शर्मा र दीपेन्द्र यादव विजयी भए ।
त्यस्तै, मधेशी कोटाबाट वीरेन्द्र शाह निर्वाचित भएका छन् । यसअघि महिला सदस्यमा देविका चाम्लिङ, आदिवासी जनजातीमा पारस चाम्लिङ, अल्पसंख्यकमा मिकाइल आलम र दलितमा सुविन विश्वकर्मा निर्विरोध निर्वाचित भइसकेका थिए ।
सुनसरीमा रहेका कुल २६२ मतदाता मध्ये २४७ जनाले मतदान गरेका थिए ।
Discussion about this post