इटहरी : इटहरीमा दुई महिनाको अवधिमा कोरोना भाइरस संक्रमणको कारण ५२ जनाको निधन भएको छ ।
चालू आर्थिक वर्षको वैशाखयता असार पहिलो हप्तासम्ममा कोरोनाको दोस्रो भेरियन्टका कारण ५२ जनाको निधन भएको इटहरी उपमहानगरपालिकाकी उपमेयर लक्ष्मी गौतमले पुष्टि गरिन् ।
बिहीबार उपमहानगरपालिकाको बजेट भाषण गर्दै गौतमले कोभिडको दोस्रो भेरियन्ट आइकन २,६७२ जनामा कोरोना भाइरस संक्रमणको पुष्टि भएको उनले बताइन् ।
पालिकाले दैनिक दुईसय सम्मको स्वाव परीक्षण कार्य नियमित गरिरहेको उनको भनाइ थियो । यस्तै, ५० बेड क्षमताको नेपाल सरकारले जारी गरेको मापदण्ड पूरा गरी अक्सिजन र चिकित्सक सेवा समेत उपलब्ध हुने गरी आइसोलेसन केन्द्र र ६ बेडको कोभिड अस्पताल संचालन गरिएको उपमहानगरपालिकाले जनाएको छ ।
नगरबासी बिरामी भए तत्काल सेवा उपलब्ध गराउने दुईवटा एम्बुलेन्स सेवा र मृत्यु भएकाहरुका लागि शववहान सेवा समेत निःशुल्क उपलब्ध गराउँदै आएको गौतमले बताइन् ।
चालू वर्षको वैशाख महिनायता गरिएको एन्टिजीन र स्वाव परीक्षण गर्दा २,६७२ जनामा पोजेटिभ देखिएको र हालसम्म प्राप्त भएको तथ्याङ्क अनुसार ५२ जना मानिसको निधन भएको उपमहानगरपालिकाले जनाएको छ ।
Discussion about this post