धरान : धरानस्थित वीपी कोइराला स्वास्थ्य विज्ञान प्रतिष्ठानका पदाधिकारीको कार्यालयमा तालाबन्दी गरिएको छ । दुई सातादेखि आन्दोलनरत संयुक्त संघर्ष समितिले उपकुलपति, रेक्टर, रजिष्ट्रार र अस्पताल निर्देशकको कार्यालयमा बुधबार बिहान तालाबन्दी गरेका हुन् ।
प्रतिष्ठानको आय व्यय विवरण सार्वजनिक गर्नुपर्ने, हरेक हप्ता सार्वजनिक सुनुवाइ गर्नुपर्नेलगायतको माग गर्दै आन्दोलनरत संघर्ष समितिले पदाधिकारी असक्षम एवं गैरजिम्मेवार भएको भन्दै राजीनामा माग गरेका छन् । समितिले स्वास्थ्यमन्त्री अथवा प्रधानमन्त्रीकै अग्रसरतामा उच्चस्तरीय वार्ता टोलीको गठन गर्न माग गरिएको छ ।
मंगलबार संघर्ष समितिसँग वार्ता गर्ने तय भएपनि उपकुलपति डा. ज्ञानेन्द्र गिरी मादक पदार्थ सेवन गरेर आएपछि वार्ता भाँडिएको संघर्ष समितिका सदस्य रहेका डा. पदम नेपालीले बताए ।
वार्तामा उपकुलपति डा. गिरीसँगै रेक्टर प्रा. डा. गुरुप्रसाद खनाल, रजिष्ट्रार प्रा. डा. मोहनचन्द्र रेग्मी, अस्पताल डेपुटी उपनिर्देशक डा. दिव्यराज मिश्र, सहायक अस्पताल निर्देशक डा. प्रमोद बराल, सिनेटर पशुपति चौधरी लगायत सहभागी थिए ।
यस्तै, संयुक्त संघर्ष समितिले आफ्नो माग पूरा गर्न एक साताको अल्टिमेटम दिएको छ । असार २३ गतेभित्र माग सम्बोधन नगरिए सम्पुर्ण फ्याकल्टी, कर्मचारी, आवासीय चिकित्सक विद्यार्थीहरुले समूहिक राजिनामा दिने चेतावनी दिएको छ ।
Discussion about this post