विराटनगर : उपेक्षित उष्ण प्रदेशीय रोगलाई रोकथाम र नियन्त्रण गर्न तीनै तहको सरकारले समन्वय गरेर अगाडि बढ्नुपर्ने वक्ताहरूले बताएका छ्न् ।
विराटनगरमा प्रदेश १ स्वास्थ्य निर्देशनालय धनकुटाद्वारा आयोजित चौथो विश्व उपेक्षित उष्ण प्रदेशीय रोग दिवसको अवसरमा वक्ताहरूले सा कुरा बताएका हुन् ।
खासगरी गर्मी ठाउँ र सिमान्तकृत समुदायमा देखिने कुष्ठ रोग, लुतो, हात्तीपाइले, रेबिज, कालाजार, सर्पदंश, माटोबाट सर्ने जुका, फित्तेजुका, डेंगु र चिकनगुनिया र खस्रे रोग जस्ता १० वटा रोगहरू उपेक्षित रोगमा पर्ने बताएको छ ।
प्रदेश १ की स्वास्थ्य मन्त्री निर्मला लिम्बूले १० वटा रोगहरू प्राथमिकतामा नपरेपनी यी रोगहरू गम्भीर किसिमको भएको बताइन् । उनले स्वास्थ्य क्षेत्रमा प्रदेश १ ओझेलमा परेको गुनासो गरिन् ।
स्वास्थ्य निर्देशनालय धनकुटाका निर्देशक ज्ञानबहादुर बस्नेतले रोग नियन्त्रण र निवारण गर्ने कुरामा तीनै तहको सरकारले अपनत्व लिदैँ सबैको सहभागिता र सहकार्यमा अगाडि बढाइनुपर्ने बताए ।
प्रदेश १ स्वास्थ्य मन्त्रालयका नीति तथा योजना महाशाखा प्रमुख डा. सुरेश मेहताले स्वास्थ्य मन्त्रालयको बजेट न्यून हुने भएकोले त्यही अनुसार काम गर्दा सुक्ष्म तहमा गर्नुपर्दा समस्या हुने बताए ।
कार्यक्रममा सहभागीहरूले स्वास्थ्य क्षेत्र जटिल र संवेदनशील क्षेत्र भएकोले यसलाई सुरक्षित राख्न सरकार गम्भीर हुनुपर्ने बताएका थिए ।
Discussion about this post