धरान : गत पुष अन्तिम सातादेखि पानीको हाहाकार रहेको धरानमा कोकाहा नदीको पानी आइपुगेको छ । यससँगै केही राहत हुने विश्वास गरिएको छ ।
श्रमदान अभियानमार्फत् झण्डै ४० किलोमिटर दूरी पार गर्दै मध्यरातमा धरानस्थित पकुवा खोलामा पानी आइपुगेको हो । पानी धरान आइपुगेपछि धरानका मेयर हर्क साम्पाङ खुशीले रोएका छन् ।
उनै साम्पाङ मेयरमा निर्वाचित भएपछि उनकै नेतृत्वमा चलेको श्रमदान अभियानमार्फत मध्यराति १२ बजेर ३ मिनेटमा कोकाहा खोलाको पानी धरान २० स्थित पकुवा खोलामा झरेको हो ।
मेयर साम्पाङको प्रस्तावित साबुन उद्योग निर्माणस्थलको केही उत्तरमा पर्ने पकुवा खोलामा राखिएको ‘वास आउट पोइन्ट’ मा पानी आइपुगेपछि समर्थकहरुसँगै भावविह्वल बनेका साम्पाङका आँशु कोका खोलाबाट आएको पानीसँगै मिसिएको देख्न सकिन्छ ।
धरान २० स्थित हात्तीसारबाट बराहक्षेत्र हुँदै कोकाहा खोलाको पानी धरान आइपुगेको हो । अभियानका लागि देशविदेशबाट ४ करोड बढी स्वतःस्फुर्त आर्थिक संकलन गरिएको थियो भने खाद्यान्न र पाइपसमेत सहयोग गरिएको थियो ।
सुख्खायाममा चारदेखि ६ महिना काकाकुलको नियति भोग्नु धरानबासीका लागि अघोषित रुपमा वार्षिक क्यालेन्डर नै हो । तर, यसपटक सम्भवतः इतिहासमै सबैभन्दा बढी पानीको हाहाकार भोगिरहेका छन् धरानबासी ।
जबकी खानेपानीको दीर्घकालीन समस्या समाधान गर्न भनेर एसियाली विकास बैंकको ऋण तथा अनुदान सहयोगमा भूमिगत खानेपानी पनि सञ्चालनमा छ ।
स्वतन्त्रबाट विजयी भएलगत्तै खानेपानी अभियानलाई तिव्रता दिएका धरान उपमहानगरका प्रमुख हर्कराज राईलाई ‘सम्झेर’ स्वदेश र विदेशका हजारौं दाताहरू र संघसंस्थाले करिब चार करोड रुपैयाँभन्दा बढी रकम पनि पठाइसकेका छन् ।
खानेपानीकै लागि भनेर दाताहरूले रकममात्र नदिएर जिन्सीको रुपमा लाखौं रुपैयाँका पाइपसमेत खरिद गरेर दिएका थिए ।
धरान आसपासका खोलाखोल्सीहरू पकुवा, निसाने र भालुखोला छान मारेर पाइपलाइनसमेत विस्तार भएका छन् । विभिन्न ठाउँमा पानी संकलनका लागि इन्टेक ट्यांकी पनि निर्माण भएका छन् ।
धरान खानेपानी बोर्डमा नेपाल खानेपानी संस्थानको धरान शाखा समाहित भइसकेको छ ।
संस्थानले सर्दु–खर्दु मुहानबाट हिउँदमा दैनिक करिब ४० लाख लिटर र चारकोसे जंगलमा जडान गरेको पाँचवटा डिप ट्युबेलबाट आवश्यक खानेपानी आपूर्ति गर्दै आएकोमा धरान खानेपानी आयोजनाअन्तर्गतको धरान खानेपानी व्यवस्थापन बोर्डमातहतको सातवटा डिप ट्युबेलले दैनिक खानेपानी आपूर्ति गर्दै आएको दाबी गरिएको छ ।
धरानमा वर्षेनी सुख्खायाममा खानेपानीको हाहाकार हुँदै आएको छ ।
श्रमदान अभियानमार्फत पाँच इन्चे पाइपमार्फत कोकाहाको पानी ल्याउन सफल भएपछि उनी रोए । त्यससँगै उनले धरानका खानेपानी उपभोक्तालाई तत्कालका लागि राहत हुने प्रतिक्रिया दिए ।
Discussion about this post