सुनसरीको देवानगञ्ज गाउँपालिकाका पूर्व अध्यक्ष मेहताको निधन

इटहरी : सुनसरीको देवानगञ्ज गाउँपालिकाका पूर्व अध्यक्ष लालीप्रसाद मेहताको निधन भएको छ ।

नेपाली कांग्रेसका नेतासमेत रहेका मेहताको मंगलबार निधन भएको हो । देवानगञ्ज १ निवासी मेहताको ६९ वर्षीय उमेरमा विराटनगरस्थित विराट टिचिङ अस्पतालमा मृत्यु भएको हो ।

मेहतलाई हृदयघातपछि सोमबार अस्पताल भर्ना गरिएको थियो । उपचारको क्रममा अस्पतालमै मृत्यु भएको हो ।

पञ्चायतकालमा उपप्रधानपञ्च भएका उनी बहुदल आएपछि तत्कालीन मध्यहर्षाही गाविसका अध्यक्षसमेत भए । हाल उनी कांग्रेसका केन्द्रीय महाधिवेशन प्रतिनिधिसमेत हुन् ।