लोकनृत्य प्रतियोगितामा सयपत्री प्रथम

तरहरा । नेपाल रेडक्रस सोसाइटी सुनसरीले आयोजना गरेको जिल्ला स्तरीय लोकनृत्य प्रतियोगितामा तरहराको सयपत्री बोर्डिङ स्कुल प्रथम भएको छ ।
शुक्रबार तरहराको नमूना एकेडेमीमा भएको लोकनृत्य प्रतियोगितामा जिल्लाभरीका २४ वटा विद्यालय सहभागी भएका थिए । सयपत्रीको ‘गर्रा’ नृत्य प्रथम भएको हो । त्यस्तै, तरहराकै हिमशिखर बोर्डिङ स्कुल द्धितीय भएको थियो । धरानको शैनिक आवासीय विद्यालय तृतीय भएको थियो भने तरहराको ज्ञानदर्पण एकेडेमी शान्तवना भएको थियो । बिजेताहरुले ट्रफि मेडल र प्रमाणपत्र हात पारेको नमूना एकेडेमीका प्रिन्सिपल थरेन्द्र अधिकारीले बताए ।

उनका अनुसार रेडक्रस जिल्लाले आयोजना गरेको कार्यक्रम नमूना एकेडेमीको युवा रेडक्रस सर्कलले आतिथ्य गरेको थियो । अत्यन्त प्रतिष्पर्धात्मक भएको प्रतियोगितामा नृत्य निर्देशक युवराज लुईँटेल र इश्वरी प्रसाद सिक्देल निर्णायक रहेका थिए ।
कार्यक्रमका प्रमुख अतिथि नेपाली कांग्रेस इटहरी उपमहानगरपालिकाका सभापति हेमकर्ण पौडेलले रेडक्रस मानवीय सेवामा समर्पित रहेकाले यसबाट विद्यार्थीहरुलाई समेत सकारात्मक प्रभाव पारेको बताए । उनले भने, ‘मानव भएर जन्मिएपछि एक मानवले अर्को मानिसलाई सहयोग गर्नुपर्छ, यसैले पनि रेडक्रसको योगदान सराहनीय रहेको छ ।’

उनले गीत संगीतको क्षेत्रमा नेपालमा विदेशी संस्कृति भित्रिएको स्मरण गराउँदै लोकनृत्य प्रतियोगिता हुनुले नेपालको कला र संस्कृतिको जगेर्ना हुनेमा जोड दिए । उनले नेपाली समाज रुपान्तरणका निम्ति विद्यार्थीहरुको योगदान रहने र उनीहरुका लागि कला र संस्कृतिलाई चिनाउँन आवश्यक रहेको सुनाए । कार्यक्रममा रेडक्रस हाँसपोसा उपशाखा सभापति चन्द्र कुमार गिरीले पनि नेपालको कला संस्कृति लोप हुँदै गईरहेको समयमा उक्त कार्यक्रम आयोजना हुनु सराहनीय रहेको बताए । युवा रेडक्रस सर्कल नमूना एकेडेमीका अध्यक्ष दिवस नारायण चौधरीको सभाध्यक्षमा भएको कार्यक्रम विद्यालयका शिक्षक चुडामणि बानियाँले सञ्चालन गरेका थिए ।